پلاستيك بوتەلكەلەردىڭ ادام دەنساۋلىعىنا زيانى تۋرالى بۇرىننان ايتىلىپ ءجۇر. الايدا تۇرمىستا قولايلى بولعاندىقتان سۋسىندار مەن ماي تۇرلەرىن ساقتاپ، تاسىمالداۋدا بۇدان ىڭعايلى ىدىس ءتۇرى ازىرشە تابىلماي تۇر. پلاستيكالىق ىدىس-اياقتا ساقتالعان تاعامعا سىڭگەن حيميالىق ۋلى زاتتار ادام اعزاسىنا تۇسكەندە دەنساۋلىققا باياۋ تۇردە زالال كەلتىرەدى ەكەن. بۇگىندە جۇرتشىلىق پلاستيك بوتەلكەگە قۇيىلعان سۋسىندى ىشۋگە قۇمار. كەيبىر كىسىلەر بوساعان پلاستيك ىدىستى ساقتاپ قويىپ، باسقا دا تاعامداردى سالۋعا پايدالانادى. ال بۇنىڭ زيانى وراسان ەكەنىن  عالىمدار دالەلدەۋدە. بۇل تۋرالى Qamshy.kz"The Sun"-عا سىلتەمە جاساپ حابارلايدى.

پلاستيك بوتەلكەنى بىرنەشە قايتا پايدالانۋ اعزانىڭ ۋلانۋىنا، اقىرى كوپتەگەن اۋرۋلاردىڭ تۋىنداۋىنا اكەپ سوعادى. عالىمدار پلاستيك ىدىس قانشا جۋىلسا دا وعان جابىسقان باكتەريالار جويىلمايتىنىن ايتۋدا. كانادالىق قوعام دەنساۋلىعىنا قاتىستى جۋرنالدا جاريالانعان ماقالادا مەكتەپ وقۋشىلارى  پايدالانعان 76 بوتەلكەنىڭ زەرتتەلگەنى تۋرالى جازىلعان. بوتەلكەلەردەن ۋلانۋعا اكەلىپ سوعاتىن باكتەريالاردىڭ جوعارى دەڭگەيى انىقتالعان. تەحاس ۋنيۆەرسيتەتىنىڭ دەنساۋلىق ورتالىعىندا جۇمىس ىستەيتىن مەديسينا عىلىمدارىنىڭ دوكتورى  ريچارد ۋوللەس زەرتتەۋ ناتيجەسىندە «ۋلانۋعا اكەپ سوعاتىن بارلىق باكتەريالار پلاستيك بوتەلكەلەردە بار» دەگەن قورىتىندى شىعارعان. سوندىقتان عالىمدار پلاستيك بوتەلكەلەردى ۇيدە ساقتاماۋعا كەڭەس بەرەدى.