ساياساتتانۋشى رۋسلان جانعازى قىلمىستىق-اتقارۋ جۇيەسى مەكەمەلەرىن ىشكى ىستەر مينيسترلىگىنەن الىپ، ۇلتتىق قاۋىپسىزدىك كوميتەتى قۇزىرىنا بەرۋدى ۇسىندى، - دەپ حابارلايدى Qamshy.kz.
«قازاقستاننىڭ قۇقىققورعاۋ جۇيەسىن رەفورمالاۋ اياسىندا قىلمىستىق-اتقارۋ جۇيەسىن مودەرنيزاسيالاۋ تۋرالى ويلانۋدى ۇسىنامىن. سول باعىتتاعى 
شارالاردىڭ ءبىرى رەتىندە قىلمىستىق-اتقارۋ جۇيەسى كوميتەتىن (قاجك) باسقا مەملەكەتتىك ورگان قۇزىرىنا بەرۋ ۇسىنىلادى»، - دەپ جازادى ساياساتتانۋشى.
«تۇزەۋ مەكەمەلەرىنىڭ قىزمەتكەرلەرى ونداعى جەدەل احۋالدى باقىلاۋ مەن ءدىني ەكسترەميزمنىڭ تارالۋىنا قارسى تۇرۋ جونىندەگى مىندەتتەرمەن ءتيىمدى اينالىسا الماي وتىرعانىن» ايتقان ول «قاجك ءىىم قۇرامىندا قالسا تىم دورەكى جۇمىس ىستەيدى، ال، ادىلەت مينيسترلىگىنە وتسە تىم جۇمساقتىق تانىتادى» دەپ سانايدى.
«نەعۇرلىم ءتيىمدى جول – قاجك-نى ۇقك قۇرامىنا بەرۋ»، - دەيدى.
«سوڭعى، الماتىدا بولعان تەراكتىنى تالداۋ كۇدىكتىنىڭ سالافيتتەرمەن كولونيادا بايلانىسقا تۇسكەنىن كورسەتتى.
قاجك-نىڭ ۇقك-گە ءوتۋى سوتتالعانداردىڭ يدەولوگيالىق وڭدەۋ جانە ىقتيمال يندوكتريناسياسى كەزەڭىندە ءدىني ەكسترەميزمنىڭ الدىن الۋعا باعىتتالعان جەدەل جۇمىس جۇرگىزۋگە مۇمكىندىك بەرەر ەدى، - دەپ سانايدى رۋسلان جانعازى.
ساياساتتانۋشىنىڭ ويىنشا، وسىنداي جۇيە ورناسا، جيھاد جولىنا ءتۇسۋى مۇمكىن سوتتالعانداردىڭ بوستاندىققا شىعۋىنا توسقاۋىل قويىلادى.
سونداي-اق، ۇقك-گە ءدىني ەكسترەميزم، تەرروريزم باپتارى بويىنشا سوتتالعانداردى تولىق وقشاۋلاۋدى قامتاماسىز ەتۋ كەرەكتىگىن ۇسىنادى.
ساياساتتانۋشى بۇل ۇسىنىسى جۇزەگە اسسا، ارنايى كونتينگەنتتىڭ يدەولوگيالىق تۇرعىدا «ۋلانۋ» ءقاۋپى ازايىپ، قاتەرلى الەۋمەتتىك ۆيرۋستىڭ بوستاندىققا شىعۋىنا توسقاۋىل قويىلاتىنىنا سەنىمدى.
