قازاقستاننىڭ ماڭعىستاۋ وبلىسىنداعى «بۇرعىلاۋ» مۇناي سەرۆيستىك كومپانياسىنىڭ جۇزدەگەن جۇمىسشىسى بۇگىن تاڭەرتەڭ جۇمىسقا شىعۋدان باس تارتىپ، كاسىپورىن باسشىلىعىنا تالاپ قويدى. جۇمىسشىلار مەن كاسىپورىن باسشىلارىنىڭ، سونداي-اق جەرگىلىكتى بيلىك وكىلدەرىنىڭ كەلىسسوزدەرىندە ايقاي كوپ بولدى، - دەپ حابارلايدى Qamshy.kz centralasian.org-كە سىلتەمە جاساپ.

بۇرعىلاۋ قۇرىلعىلارى ورنالاسقان ايماققا بارۋلارى كەرەك بولعان جۇزدەگەن ۆاحتاشى جاڭاوزەندەگى اۆتوبۋس بەكەتىنىڭ ماڭىنا جينالىپ، جالاقى مەن جۇمىس ۋاقىتىنىڭ قىسقارتىلۋىنا نارازىلىقتارىن ءبىلدىردى. جينالعانداردىڭ ايتۋلارىنشا، جۇمىس بەرۋشى داعدارىستىڭ سالدارىنان اقشا جەتىسپەيدى دەگەندى العا تارتىپ كەلەدى، ءبىراق بۇرعىلاۋ قوندىرعىلارىنداعى جۇمىس جوسپارى كۇندەلىكتى ورىندالىپ وتىر.

بۇعان قوسا، ۆاحتاشىلار كومپانيا باسشىلىعىنىڭ ۇجىم اتىنان سويلەيتىن بەلسەندىلەردى قۋدالاپ، جۇمىستان شىعارعانىن مالىمدەدى. سوعان بايلانىستى ولار «بۇرعىلاۋ» كومپانياسىنىڭ باس ديرەكتورى اسحات سارييەۆتىڭ جۇمىستان كەتۋىن تالاپ ەتتى. «ساعاتتى قىسقارتىپ تاستادى. كاسىپورىندا 2200 ادام ىستەيدى. جارتى جىلدا 66 ادامدى جۇمىستان شىعاردى»، - دەدى مۇناي وپەراتورىنىڭ كومەكشىسى اقىلبەك نۇرلىبايەۆ.

جينالعاندار مەكەمە كاسىپوداعىنا سەنىمسىزدىك ءبىلدىرىپ، كاسىپوداق جەتەكشىلىگىنە وزدەرى سايلاپ العان ءسادۋاقاس بەكقالييەۆتىڭ جۇمىس ىستەۋىنە كەدەرگى كەلتىرمەۋلەرىن تالاپ ەتتى. بەكقالييەۆتىڭ ءوزى بۇگىنگى جيىندا بولعان جوق. جۇمىسشىلاردىڭ ايتۋلارىنشا، ونى پوليسياعا تەرگەۋگە الىپ كەتكەن. جۇمىسشىلار نارازىلىقتىڭ ءتورت كۇن بۇرىن باستالعانىن مالىمدەدى، ءبىراق قالاعا ب ا ق وكىلدەرى كەلمەيىنشە، كاسىپورىن باسشىلىعى مەن جەرگىلىكتى بيلىك وكىلدەرى ولاردىڭ تالاپتارىنا قۇلاق اسپاي كەلگەن.

جۇمىسشىلارمەن كەزدەسۋگە كەلگەن «بۇرعىلاۋ» كومپانياسىنىڭ باس ديرەكتورى اسحات سارييەۆ كاسىپورىندا بەلسەندىلەردى قۋدالايدى دەگەن ايىپتاۋلاردى جوققا شىعاردى.

ەسكەرتۋ: ۆيدەودا بەيادەپ سوزدەر ايتىلادى.

فوتو، ۆيدەوماتەريالدار ازاتتىق سايتىنان الىندى.