قالا باسشىسى لاۋازىمىنا 21 ادام ۇمىتكەر بولعان. ولاردىڭ اراسىنان بۇرىنعى قورعانىس ءمينيسترى يۋريكو كويكە 2 ميلليون 912 تىسياچ داۋىس جيناپ، باسىپ وزدى. «NHK» تاراتقان اقپاراتقا سۇيەنسەك، سايلاۋعا قاتىسۋشىلاردىڭ سانى 59،73 پايىزعا جەتكەن. بۇل 2014 جىلعى كورسەتكىشپەن سالىستىرعاندا جوعارى. يۋريكو كويكەنىڭ باستى قارسىلاستارى بۇرىنعى جالپىۇلتتىق ىستەر جونىندەگى مينيستر حيرويا ماسۋدا مەن تەلەجۇرگىزۋشى جۋرناليست سيۋنتارو توريگوە. ولار 1،93 ميلليون جانە 1،35 ميلليون داۋىس جيناعان.
توكيو مەرى 2011 جىلدان بەرى ءتورتىنشى رەت وزگەرىپ وتىر. سوڭعى ەكى باسشى قارجىلىق داۋدان كەيىن قىزمەتتەرىنەن كەتكەن. اقپارات قۇرالدارىندا توكيونىڭ جۋىردا قىزمەتىنەن كەتكەن بۇرىنعى باسشىسى يويچي ماسۋدزوە قىزمەتتىك كولىكتى ءوز ماقساتىنا پايدالانعانى تۋرالى ماقالالار شىققاننان كەيىن ورنىن بوساتقان. جۇرت قالا مەرىن قىزمەتتىك كولىكتى داچاسىنا ءمىنىپ بارعانى ءۇشىن سوككەن. سونداي-اق بۇرىنعى باسشىنىڭ وتباسىمەن دەمالىسقا ساياسي قور قاراجاتىن پايدالانعاندىعى تۋرالى دا جازىلعان.
سايلاۋداعى جەڭىسىنەن كەيىن العاشقى رەسمي مالىمدەمە جاساعان يۋريكو كويكە قالا اكىمشىلىگىن رەفورمالايتىنىن جانە بالالارعا كۇندىز قارايتىن مەكەمەلەر مەن قاريالاردى باعۋعا ارنالعان مەكەمەلەردىڭ ازدىعى ماسەلەسىن شەشكىسى كەلەتىنىن ايتتى.
شارافات جىلقىبايەۆا
