اقش پرەزيدەنتتىگىنەن باستى ۇمىتكەردىڭ ءبىرى دونالد ترامپتىڭ كارەراسىنا ايەلدەردىڭ ىقپالى بولدى ما؟ «كومسومولسكايا پراۆدا» باسىلىمىنىڭ جۋرناليستەرى كونستانتين زەلەنوۆ پەن ەدۆارد چەسنوكوۆ اتاقتى ميللياردەردىڭ ومىرىندە ۇلكەن ءرول اتقارعان ايەلدەر ءومىرىن زەرتتەگەن ەكەن.

جەتپىسكە اياق باسقان دونالد ترامپتىڭ نەكەلى ءۇش ايەلمەن نەكەلەسكەنىن جۇرتتىڭ ءبارى بىلە بەرمەيدى. ءۇش ايەلدىڭ ەكەۋى سلاۆيان تەكتى. ولاردان بەس بالا، سەگىز نەمەرە ءسۇيىپ وتىر. ترامپتىڭ باسقا دا سۇلۋلىق بايقاۋىنىڭ قاتىسۋشىلارىمەن دوستىعى بار. اقش ميللياردەرى «اقش ارۋى»، «جاھان ارۋى» ءتارىزدى بايقاۋلاردىڭ ۇيىمداستىرۋشىسى رەتىندە بەلگىلى.

پرەزيدەنت تاعىنان ۇمىتكەردىڭ العاشقى ايەلى يۆانا زەلنيچكوۆا، 67 جاستا. ول ترامپپەن 15 جىل بىرگە تۇرعان (1977-1992).  قىزىنان تۋعان ەكى جيەنى بار. يۆانا زەلنيچكوۆا چەحوسلوۆاكيادا تۋىپ وسكەن. 1970 جىلدارى كاناداعا قونىس اۋدارىپ، كەيىن اقش-قا كوشكەن. ول نيۋ-يوركتە توپ-مودەل بولا ءجۇرىپ ترامپپەن تانىسقان. يۆانا زەلنيچكوۆا ترامپتىڭ بيزنەستە تاسىنىڭ ورگە دومالاۋىنا ىقپال ەتكەن بىردەن ءبىر ايەل. كۇيەۋى وزىنەن ون بەس جاس كىشى مارلا مەيپلسپەن كەزدەسە باستاعاندا اجىراسادى. بۇل 1990  جىلدار ەدى.

بۇگىندە 52 –گە تولىپ وتىرعان مارلا مەيپلس ترامپپەن التى جىل بىرگە تۇرعان. (1993-1999). ءبىر قىزى بار. ەكەۋىنىڭ نيۋ-يوركتەگى اتاقتى وتەلدە وتكەن ۇيلەنۋ تويىنا مىڭنان استام ادام كەلگەن. مارلا كۇيەۋىمەن اجىراسقاننان كەيىن ول تۋرالى «جىلتىراعاننىڭ ءبارى التىن ەمەس» دەگەن ەكەن.

اتاقتى بايدىڭ بۇدان كەيىنگى ايەلى مەلانيا كناۋسس، 46 جاستا. ون ءبىر جىل بولىپتى ۇيلەنگەندەرىنە. اقش-تاعى ايگىلى مودەل ترامپتان ءبىر ۇل تۋعان. مەلانيا كناۋسس دا سلاۆيان تەكتى. ول يۋگوسلاۆيادان شىققان   كوممۋنيستىڭ قىزى. 18 جاسىندا مودەل بولىپ جۇمىس ىستەۋ ءۇشىن باتىسقا كوشىپ بارعان. 26 جاسىندا نيۋ-يوركتەگى جوعارى ءسان اپتالىعىندا  ترامپپەن تانىسقان. ءبىراق مەلانيا ترامپقا 35 جاسىندا تۇرمىسقا شىققان (العاش تانىسقان كەزىندە ترامپ ەكىنشى ايەلىمەن اجىراسپاعان بولاتىن). ەكەۋىنىڭ ۇيلەنۋ تويىنا ترامپتىڭ قازىرگى سايلاۋ الدى ناۋقانداعى باستى قارسىلاسى حيللاري كلينتون قاتىسقان. مەلانيا كناۋسستىڭ جۋرنال مۇقابالارىنا تۇسكەن جالاڭاش سۋرەتتەرى امەريكاندىقتار اراسىندا قىزۋ تالقىلانۋدا.

جۋرناليستەر، سونداي-اق ترامپتىڭ ايگىلى ديانا سپەنسەرگە دە عاشىق بولعانى تۋرالى جازادى. كارا يانگ ەسىمدى كاليفورنيا ارۋى دا جۋرنال مۇقابالارىندا سۋرەتىن جاريالاپ ءجۇرىپ، ترامپتىڭ كوزىنە تۇسكەن. ءبىراق ەكەۋىنىڭ دوستىعى ۇزاققا سوزىلماعان كورىنەدى. ترامپ يتالو-فرانسۋزدىق اقىن كارلا برۋنيمەن دە دوستاسقان كورىنەدى. ول فرانسيا پرەزيدەنتى  نيكوليا ساركوزيدىڭ ءۇشىنشى ايەلى دەسەدى. ساراپشىلار اتاقتى ميللياردەردىڭ ايەلقۇمارلىعى ونىڭ سايلاۋ الدى ناۋقانىنا اسەر ەتۋى مۇمكىن دەيدى.

ازىرلەگەن دانا قامشىبەك