اۋىر اتلەتيكادان قىزدار اراسىندا ەل نامىسىن قورعاعان كارينا گوريچيەۆا قوسسايىستىڭ قورىتىندىسى بويىنشا 243 (111+132) كەلىنى كوتەرىپ، ريو وليمپياداسىنىڭ قولا جۇلدەگەرى اتاندى، - دەپ حابارلايدى Qamshy.kz قازاقپاراتقا سىلتەمە جاساپ.

سەرپە كوتەرۋدە قىتايلىق اتلەت 147 كەلىنى ەنسەردى. قوس سايىستىڭ قورىتىندىسى بويىنشا 262 كەلىمەن دەنگ ۆەي الەمدىك رەكوردتى جاڭارتتى (115+147). ەكىنشى ورىن سولتۇستىك كورەيا وكىلى چۋ حە سيمگە بۇيىردى 248 (105+143). ال گوريچيەۆا سەرپە كوتەرۋ جاتتىعۋىن 132 كەلىمەن اياقتاپ، قولا جۇلدەگەر اتاندى.  

سەرپە كوتەرۋدە جەرلەسىمىز ءبىرىنشى مۇمكىندىگىندە 132 كەلىنى باعىندىرسا، ەكىنشى جانە ءۇشىنشى مۇمكىندىگىندە 137 كەلىنى كوتەرە المادى.

ال وسىعان دەيىن العاشقى جاتتىعۋدا ول ءبىرىنشى مۇمكىندىگىندە 107 كەلىنى باعىندىرا المادى. ال ەكىنشى مۇمكىندىگىندە تۋرا وسى سالماقتى قينالماي باعىندىردى. ءۇشىنشى مۇمكىندىگىندە 111 كەلى زىلتەمىردى باسىنان اسىرا كوتەردى.

مىنە، وسىلايشا بۇگىن قازاقستان قورجىنىنا ءۇشىنشى قولا مەدال ءتۇستى.

ەستەرىڭىزگە سالا كەتەيىك، كارينا گوريچيەۆا اۋىر اتلەتيكامەن 15 جاسىنان بەرى اينالىسىپ كەلەدى. ول ەرەكشە دارىندى بالالارعا ارنالعان رەسپۋبليكالىق مەكتەپ-ينتەرناتىنىڭ تۇلەگى.

كارينا جاسوسپىرىمدەر اراسىنداعى الەم چەمپيوناتىنىڭ كۇمىس، قولا جۇلدەگەرى جانە جاسوسپىرىمدەر اراسىنداعى ازيا چەمپيوناتىنىڭ قول جۇلدەگەرى.

قازاقستان رەسپۋبليكاسىنىڭ حالىقارالىق دارەجەدەگى سپورت شەبەرى.

ەستەرىڭىزگە سالا كەتەيىك، وليمپيادانىڭ ءبىرىنشى كۇنى دزيۋدوشى ەلدوس سمەتوۆ كۇمىس، گالبادراح وتگونسەسەگ قولا مەدال ەنشىلەسە، كەشە  اۋىر اتلەت فارحاد حاركي ءۇشىنشى مەدالدى ەل قورجىنىنا سالدى.  سونداي-اق، ايتا كەتەيىك، جارىستىڭ ءبىرىنشى كۇنى مارگاريتا ەليسەيەۆا بەسىنشى ورىنعا، ەكىنشى كۇنى ارلي چونتەي ءتورتىنشى ورىنعا تابان تىرەگەن بولاتىن.