شىعىس قازاقستاندا اۋىل شارۋاشىلىق جەرلەرىن جالعا العان قازاق-قىتاي بىرىككەن كاسىپورنىنىڭ باسشىلارىنا قاتىستى قىلمىستىق ءىس قوزعالدى،- دەپ حابارلايدى Qamshy.kz.

بۇل تۋرالى فەيسبۋك الەۋمەتتىك جەلىسىندە ءوزىن «نۇر وتان» پارتياسىنىڭ مۇشەسى دەپ تانىستىرىپ جۇرگەن بەلسەندى ايدىن ەگەۋبايەۆ جاريالادى.

«سىزدەرگە شىعىس قازاقستان وبلىسى ءۇرجار اۋدانىندا جۇڭگو ازاماتتارىنىڭ ينۆەستيسيا سالۋ ماقساتىندا 90000 گا جۋىق جەر الىپ العاندىعى تۋرالى، جۇڭگو كومپانيالارىنىڭ قازاقستان مەملەكەتىنەن سۋبسيديا العاندىعى تۋرالى جاريالاعان بولاتىنبىز.

«ۇلى دالا قىراندارى» رەسپۋبليكالىق قوزعالىسى جانە «الاش جولى» قوزعالىسى بىرلەسىپ وسى ماسەلەلەردى انىقتاپ، قازىرگى تاڭدا قۇزىرلى مەكەمەلەر قىلمىستىق ءىس قوزعالعانى تۋرالى مالىمەتتى جاريالاپ وتىرمىز»، - دەگەن ول وسى ماسەلەنى قوعامنىڭ قىراعى قاداعالاۋىن سۇرايدى.

بۇعان دەيىن ساياساتكەر مۇحتار تايجان قىتايلىقتاردىڭ ۇلەسى بار «دارەمەت» ج ش س جالعا العان جەرىن «ءباتۋا» جشس-عا بەرگەنى، «ءباتۋانىڭ» مەملەكەتتەن 2012-2015 جىلدارى 500 ميلليون تەڭگە قارجىلاي دوتاسيا الىپ، ونى دۇرىس يگەرمەگەنى انىقتالعانىن جازعان ەدى.

ەستەرىڭىزگە سالساق، ايدىن ەگەۋبايەۆ ۇكىمەت جانىنداعى جەر كوميسسياسىنىڭ وتىرىسىندا شقو-دا 90 مىڭ گەكتارعا جۋىق جەر ۋچاسكەلەرىن قىتايلىق كومپانيا پايدالانىپ وتىرعانىن مالىمدەگەن ەدى. كەيىن بۇرىن شقو-دا اكىم بولعان بەردىبەك ساپاربايەۆ ءوزىنىڭ ەشقانداي كومپانياعا زاڭسىز جەر بەرمەگەنىن ايتىپ، ا. ەگەۋبايەۆتىڭ ۇستىنەن سوتقا شاعىمدانعان بولاتىن.