ۇقك جەمقورلىق داۋىنا بايلانىستى قورعانىس مينيسترلىگىندە اۋقىمدى تەكسەرىس جۇرگىزىپ جاتىر، - دەپ حابارلايدى Qamshy.kz كتك ارناسىنا سىلتەمە جاساپ.

قورعانىس مينيسترلىگىندە ءىرى جەمقورلىق داۋى. ۇلتتىق قاۋىپسىزدىك كوميتەتى قورعانىسقا بولىنگەن بيۋدجەت قارجىسىن ۇرلاۋمەن اينالىسقان قىلمىستىق توپتى ۇستادى. ارنايى قىزمەت  مينيسترلىكتىڭ  ماتەريالدىق-تەحنيكالىق قامتاماسىز ەتۋ باس باسقارماسى باستىعىنىڭ ورىنباسارى ت. جۇمقازييەۆتىڭ قولىنا كىسەن سالعان.  

قۇزىرلى ورگانداعى مالىمەت بويىنشا، پودپولكوۆنيك مەملەكەتتتىك تەندەردى مايشەلپەككە اينالدىرعان. ول  كونكۋرستىق كوميسسيانىڭ ءتوراعاسى بولىپ، كاسىپكەرلەرمەن اۋىز جالاسىپتى. ياعني قورعانىس مينيسترلىگىنە كەرەكتى قارۋ-جاراق سياقتى تەحنيكانى ساتىپ الۋعا بولىنگەن قازىنا قارجىسىن سىبايلاستارىمەن بىرىگىپ جەگەن. بۇل ويىن جۇزەگە اسىرۋ ءۇشىن قورعانىس پەن قارجى مينيسترلىگىندەگى شەندىلەردى قىلمىستىق ىسىنە قوسقان. ءتىپتى 8 تامىزدا پودپولكوۆنيك ت. جۇمقازييەۆ 20 ميلليون تەڭگە پارا الىپ جاتقان ساتىندە قۇرىقتالعان. ونىمەن بىرگە قورعانىس مينيسترلىگىنىڭ 5 لاۋازىمدى قىزمەتكەرى مەن 4 بيزنەسمەننىڭ قولىنا كىسەن سالىنىپتى.

ۇقك باسپا ءسوز قىزمەتى بۇگىن قورعانىس مينيسترلىگىندە قارجى جىمقىرۋدىڭ قۇپيا سحەماسى اشكەرە بولعانىن حابارلادى. شۋلى ءىس وسى تۇتقىنداۋلارمەن شەكتەلە مە، الدە لاۋازىمدى باسقا دا شەندىلەر كۇدىككە ىلىنە مە ول جاعى ازىرگە بەلگىسىز.

ال، اتالعان تۇتقىنداۋلارعا قاتىستى پىكىر بىلدىرگەن قورعانىس مينيسترلىگى وتكەن جىلدىڭ قاراشا ايىندا مينيسترلىك پەن باس پروكۋراتۋرا، ۇلتتىق قاۋىپسىزدىك كوميتەتى، جەمقورلىققا قارسى ءىس-قيمىل جانە مەملەكەتتىك قىزمەت ىستەرى جونىندەگى اگەنتتىك، ىشكى ىستەر مينيسترلىگى اراسىندا جەمقورلىقپەن كۇرەس جونىندەگى مەموراندۋم جاسالعانىن، ۆەدومستۆو باسشىلىعى قازىنا قاراجاتىن توناۋشىلارمەن اياۋسىز كۇرەس جۇرگىزۋگە مۇددەلى ەكەندىگىن جاريالادى.