الماتىنىڭ ىرگەسىندەگى «اسىل ارمان» تۇرعىن ءۇي كەشەنىنىڭ تۇرعىندارى ۋلى گازدان تۇنشىعىپ جاتىرمىز دەپ شاعىمدانىپ وتىر. 20 مىڭعا جۋىق ادام  بەتتەرىنە مەديسينالىق ماسكا كيىپ جۇرۋگە ءماجبۇر. بۇگىن جەرگىلىكتى جۇرت،  جاعدايدى رەتتەپ بەرە الماي جۇرگەن اكىمگە  ۋلى گاز تارالعان اۋماققا كەلىپ تۇنەپ قايتۋدى ۇسىندى، - دەپ حابارلايدى Qamshy.kz 31-ارناعا سىلتەمە جاساپ.

شەرحان ەسىركەن اسىل ارمان تۇرعىن ءۇي كەشەنىنە بوي كوتەرگەندە-اق كوشىپ كەلگەن. اسىل ارمانىم ورىندالدى دەگەن جىگىت بۇگىن كورشىلەرىنىڭ بارلىعىنا مىناداي مەديسينالىق بەتپەردەلەر تاراتىپ ءجۇر. ونىڭ سەبەبى دە جوق ەمەس. تۇرعىلىقتى جەردە اۋا لاستانىپ كەتكەن. ماماندار جاساعان ساراپتاماعا سايكەس بۇل اۋماقتا مەتان 22، اممياك 9، ال كۇكىرتتىكومىرتەك نورمادان 740 ەسە اسىپ كەتكەن.

شەرحان ەسىركەن، «اسىل ارمان» ءتۇرعىن-ۇي كەشەنىنىڭ تۇرعىنى:

- 500 مەتر جەردە قوقىس تاستايتىن كولشىكتەر بار. سوندا وزدەرىنىڭ قالدىقتارىن قاعاز زاۋىتى جانە اباي اۋىلىنىڭ تۇرعىندارى تاستاپ كەتەدى. ەكى تاراپقا دا ءبىز ەسكەرتۋ جاساعانبىز. الايدا قۇلاقتارىنا دا قىستىرماي قويدى.

قاعاز شىعاراتىن زاۋىتتىڭ ماسەلەدەن حابارى بار.  ءتىپتى «ىسكە قاتىسىمىز جوق» دەپ ات توندارىن الا قاشپادى دا. ءبىراق حالىقتى ۋلاپ، ساسىق ءيىستىڭ تارالۋى قاعاز قالدىقتارىنان بولۋىنا كۇمانمەن قارايدى.  

يۋريي ەرماكوۆ، «Kagazy Recycling» ج ش س تەحنيكالىق دەپارتامەنتىنىڭ جەتەكشىسى:

- زاۋىت 2001 جىلدان بەرى جۇمىس ىستەپ كەلەدى. قوقىس توگەتىن ورىندار بىزگە قۇس فابريكاسىنان قالعان بولاتىن. قالدىقتار سول ۋاقىتتان بەرى تاستالىپ كەلەدى. جاسىرمايمىن. الايدا، وندا ءبىز حيميكات، بولماسا ۋلى زاتتار تاستامايمىز.

«اسىل ارمان» تۇرعىن ءۇي كەشەنىن تۇرعىزاردا بۇل قالدىق تاستايتىن ورىننىڭ نەلىكتەن ەسكەرىلمەگەنى بەلگىسىز دەگەندى تىلگە تيەك ەتتى كومپانيا قىزمەتكەرى. سونداي-اق 15 جىلدان بەرى جاساپ كەلگەن جۇمىسىمىزدى ءارى قاراي دا جالعاستىراتىن بولامىز دەيدى ولار. بۇل تۇستا جەرگىلىكتى تۇرعىنداردىڭ كومپانيا باسشىلىعىنا جانە قاراساي اۋدانىنىڭ اكىمشىلىگىنە ايتارى بار.

شەرحان ەسىركەن، «اسىل ارمان» ءتۇرعىن-ۇي كەشەنىنىڭ تۇرعىنى:

- مىنا كىسىلەر تۇرعان جەرگە قاعازى رەسايلينگ جانە قاراساي اۋدانى اكىمىن شاقىرىپ، ولارعا كيىز ءۇي تىگىپ بەرمەكشىمىز. ولار وسىندا كەلىپ، تۇرىپ كورسىن. ءبىز جۇتىپ جۇرگەن اۋانى جۇتىپ، ساسىق ءيىستى سەزسسىن. ەگەر بارلىعى تازا دەپ ويلاسا كەلىپ تۇرسىن. الداعى ەكى اپتادا ماسەلە شەشىلمەسە كيىز ءۇيدى وسىندا تىگىپ قويامىز.

جەرگىلىكتى جۇرت ماسەلە الداعى ەكى اپتادا شەشىلمەسە، اكىم مەن كومپانيا باسشىلارىنا ارنايى شاقىرتۋ جىبەرەمىز دەيدى. نە اكىم كەلىپ قونىپ ءقايتسىن، نە اۋا تازارسىن دەگەندەرگە بيلىكتەگىلەر ءالى جاۋاپ بەرمەدى.