اقتوبەدە جات اعىمنىڭ جەتەگىندە كەتكەندەر جاپپاي جۇمىسقا ورنالاستىرىلۋدا، - دەپ حابارلايدى Qamshy.kz 31-ارناعا سىلتەمە جاساپ.
اقتوبەدە جات اعىمداعىلاردى جاپپاي جۇمىسقا تۇرعىزۋ ناۋقانى باستالدى. جەرگىلىكتى بيلىك ءداستۇرلى دىننەن تەرىس اينالعاندارمەن ەندى وسىلاي كۇرەسپەك. ءقازىردىڭ وزىندە اقتوبە وبلىسى بويىنشا عانا مىڭ جارىم ادام راديكالدانۋعا بەيىم ماقساتتاعى توپتاردىڭ تىزىمىندە تۇر. ولاردىڭ ءبارىن جۇمىسپەن قامتۋعا اكىمدىكتىڭ شاماسى جەتە مە؟ جانە قانداي جۇمىس ورنىن ۇسىنباق؟
اقتوبەدەگى 5 ماۋسىمداعى تەراكتتان كەيىن جەرگىلىكتى بيلىك جان-جاقتى ويلانعانداي. اقتوبەدەگى بارلىق جات اعىمداعىلاردىڭ بەتىن قايتارىپ، ولاردى جۇمىسپەن قامتۋدى قولعا الدى. بۇل باستامانىڭ قانشالىقتى ناتيجەلى بولارى ازىرگە بەلگىسىز. ويتكەنى، ءدىن وكىلدەرىنىڭ ايتۋىنشا بۇگىنگى كۇنگە دەيىن ۋلانعان سانانى بىردەن قالپىنا كەلتىرۋ وڭاي ەمەس.
اسلانبەك تىنىشتىقوۆ، «اڭسار» اقپاراتتىق تالداۋ ورتالىعى باسشىسىنىڭ ورىنباسارى:
- تەرىس ءدىني باعىتتا جۇرگەن ازاماتتاردىڭ باسىم كوپشىلىگى مەملەكەتتىڭ تاراپىنان ۇسىنىلاتىن وسىنداي كومەكتەردەن باس تارتادى. وسى ۋاقىتقا دەيىن ءبىز ولاردى اقتوبە قالالىق ىشكى ساياسات ءبولىمى مەن جۇمىسپەن قامتۋ ورتالىعىنا اپارىپ، سۇحباتتاسىپ، ايەل جاماعاتتار مەن ەر جاماعاتتارمەن سويلەسىپ، سول جۇمىسقا ورنالاسۋعا مۇمكىندىك بار ەكەنىن ،سونتاي تەتىكتەردىڭ قاراستىرىلعانىن ءبىزدىڭ تاراپىمىزدان ايتىپ تۇسىندىردىك.
اقتوبەدەگى ءدىن ماماندارى مەن تەولوگتار ءدال ءقازىر وسى شارۋامەن اينالىسۋدا. تەك قالا ەمەس، وبلىس اۋماعىنداعى اۋداندارعا بارىپ، تەرىس اعىم جەتەگىندەگىلەردى رايىنان قايتارۋعا تىرىسىپ جاتىر. مامانداردىڭ ايتۋىنشا ولاردى جۇمىسقا تۇرعىزۋدىڭ ءوزى قيىن ماسەلە. ويتكەنى ولار تاكسي قىزمەتى، ۇستالعان ۇيالى تەلەفونداردى ساتۋ جانە جوندەۋ، قۇرىلىس جۇمىستارى سياقتى جەكە كاسىپتەرمەن عانا اينالىسادى. ال ازىرگە جات اعىمدا جۇرگەن مىڭ جارىم ادامنىڭ تەك 35ء-ى عانا مامانداردىڭ كەلىسسوز جۇرگىزۋى ارقاسىندا اقتوبە قالالىق جۇمىسپەن قامتۋ ورتالىعىننىڭ تىزىمىنە ءىلىنىپ، جۇمىسقا ورنالاسقان.
گۇلشات قاڭتاربايەۆا، اقتوبە قالالىق جۇمىسپەن قامتۋ ورتالىعىنىڭ ديرەكتورى:
- سول 35 ادامنىڭ ىشىندە 10 ادام قازىرگى تاڭدا تۇراقتى جۇمىستا، 12 ادام بەيرەسمي جۇمىستا جۇرگەندەر، 10 ادامنىڭ ىشىندە ەندى كوبىنەسە تەحنيكالىق ماماندىق بويىنشا جۇمىسقا ورنالاسقان ازامتتار، ەكى ايەل ادام ولار بالا كۇتىمىندە وتىر. ەندى ناقتى جۇمىس قاجەت ەتەتىن 4 ازاماتىمىز بار.
اقتوبەدەگى بۇل ناۋقان تەرىس اعىمداعىلاردىڭ سانىن ازايتۋعا قانشالىقتى كومەگىن تيگىزەرى بەلگىسىز. انىعى، جات دىنگە بەت بۇرعانداردى رايىنان قايتارۋ ازىرگە وڭاي بولماي تۇر. وعان قوسا جۇمىس بەرۋشىلەر دە ساقالدى ەركەك پەن بەتىن تۇمشالاعان ايەلدى جۇمىسقا قابىلداعىلارى كەلمەيدى.
