الماتى وبلىسىندا الىپ قاشۋ كەزىندە اپاتقا ۇشىراعان قىزدىڭ ەمىن ونى ايەل ەتىپ العىسى كەلگەن مارقۇم جىگىتتىڭ جاقىندارى كوتەرەتىن بولدى، - دەپ حابارلايدى Qamshy.kz كتك ارناسىنا سىلتەمە جاساپ.

بۇگىن قارا جامىلعان وتباسىنداعىلار اۋرۋحاناعا كەلىپ، ءاليا وشاقبايەۆانىڭ ءحال-جاعدايىن سۇراعان.

ياعني وتباسىن قۇرامىن دەپ، اجال قۇشقان جىگىتتىڭ تۋىستارى ناۋقاس قىزعا جاسالاتىن وتا مەن دارى-دارمەكتىڭ شىعىنىن مويىندارىنا العان. ءتىپتى قىز اياعىنان تۇرعانشا، قولدان كەلگەننىڭ ءبارىن جاسايمىز دەپتى. الايدا ناۋقاستىڭ اياققا تۇرۋ-تۇرماۋى الداعى وتادان كەيىن بەلگىلى بولادى. دۇيسەنبىدە ءاليا قالالىق اۋرۋحاناعا اۋىستىرىلماق. بىرەر كۇن بۇرىن قىز الىپ قاشۋدىڭ ارتى جانتۇرشىگەرلىك جاعدايمەن اياقتالعان ەدى. كەلىن تۇسىرۋگە اسىققان كولىك اپاتقا ۇشىراپ، كۇيەۋ جىگىت پەن 3 دوسى بىردەن قازا تاپتى. اپاتتان امان قالعان جالعىز قالىڭدىق قانا. 22 جاستاعى بويجەتكەن جىگىتتەردىڭ ونى كەلىسىمسىز الىپ قاشقانىن ايتقان بولاتىن. ءتىپتى جۇيتكىگەن كولىكتىڭ تىزگىنىندە ىشىمدىك ىشكەن پوليسيا قىزمەتكەرى وتىردى دەگەن. ءبىراق وبلىستىق ىشكى ىستەر دەپارتامەنتىندەگىلەر مۇنى جوققا شىعارىپ وتىر.