فەدەرالدىق قاۋىپسىزدىك قىزمەتى رەسەيمەن اننەكسيالانعان قىرىمدا ديۆەرسيا ازىرلەدى دەگەن كۇدىكپەن ۇستالعان ۋكراينا ازاماتى ەۆگەنيي پانوۆتىڭ تەرگەۋدەگى ۆيدەوسىن كورسەتتى، - دەپ حابارلايدى Qamshy.kz centralasian.org – كە سىلتەمە جاساپ.
پانوۆتىڭ ايتۋىنشا، جارتى ارالعا جەتكىزىلگەن توپتىڭ قۇرامىندا ۋكراينالىق تەرگەۋدىڭ وفيسەرلەرى كىرگەن. ايىپتالۋشى ولاردىڭ ەسىمدەرى مەن بۇركەنشىك اتتارىن اتادى.
سەپاراتيستەرگە قارسى وپەراسيا ايماعىنداعى اسكەري قيمىلدارعا قاتىستى دەپ تانىستىرىلعان پانوۆ كييەۆكە شاقىرتىلعانىن، قىرىمدا ديۆەرسيا جاساۋ ءۇشىن قۇرىلعان توپتى باسقارعانىن مالىمدەدى. ونىڭ سوزىنشە، شابۋىل پاروم وتكەلىندە، حيميالىق زاۋىتتا، مۇناي بازاسىندا جانە باسقا دا نىسانداردا جاسالۋى ءتيىس بولعان. وپەراسيا بارىسىندا بەس رەسەيلىك اسكەري فورما پايدالانىلدى، ارميانسك قالاسىندا قارۋ-جاراق جانە جارىلعىش زاتتار قويماسى جاسىرىلدى، دەدى پانوۆ.
بۇعان دەيىن رەسەيدىڭ سىرتقى ىستەر مينيسترلىگى قىرىمدا ۇستالعان ەكىنشى ۋكراينالىقتىڭ ەسىمى - اندرەي زاحتەي ەكەنىن جاريالاعان ەدى. مينيسترلىك مالىمەتى بويىنشا، قىرىمدا ۋكراينا جانە رەسەي ازاماتتارى ۇستالعان. رەسەيلىك ارنايى قىزمەتتىڭ قىرىمداعى وپەراسياسى "ۋكراينا قورعانىس مينيسترلىگى باس بارلاۋ باسقارماسىنىڭ اگەنتتىك جۇيەسىنىڭ كوزىن جويۋ" دەپ اتالدى.
سول كۇنى ۋكراينالىق باس شتابتىڭ باسپا ءسوز حاتشىسى ۆلاديسلاۆ سەلەزنيەۆ رەسەي باسىپ العان قىرىمنىڭ اكىمشىلىك شەكاراسىندا رەسەيلىك اسكەردىڭ نىعايۋىنا جاۋاپ رەتىندە شارا قولدانىلىپ جاتقانىن مالىمدەدى. سەلەزنيەۆ ۋكراينالىق اسكەردىڭ پرەزيدەنت پەتر پوروشەنكونىڭ نۇسقاۋىن ورىنداپ جاتقانىن اتاپ ءوتتى، ءبىراق ناقتى قانداي شەشىم قابىلدانعانىن تۇسىندىرمەدى.
ۋكراينا سىرتقى ىستەر مينيسترلىگى حالىقارالىق ۇيىمداردى "كرەملدىڭ ارانداتۋشىلىعىنا" جاۋاپ بەرۋگە، ال ەقىۇ قىزمەتتەرىن قىرىممەن شەكاراداعى باقىلاۋىن كۇشەيتۋگە شاقىردى.
