حالىقتىڭ سۇيىكتىلەرىنە اينالعان قايرات نۇرتاستىڭ اناسى ۇلكەن تانىمالدىلىققا يە بولماس بۇرىنعى قيىن جولدى ۆيدەو ارقىلى جەتكىزدى. ءوزىنىڭ جەكە الەۋمەتتىك پاراقشاسىندا ءانشىنىڭ اناسى گۇلزيرا ايداربەكوۆا سالعان ۆيدەونى 70 مىڭعا جۋىق ادام قاراپ، وعان 300-گە جۋىق پىكىر قالدىرعان. ۆيدەودا قايرات نۇرتاستىڭ مەكتەپ ساحناسىنان قازىرگى ۇلكەن ساحنالارعا دەيىنگى قيىن دا قىزىقتى جولى بەينەلەنگەن، - دەپ حابارلايدى Qamshy.kz zhambylnews.kz - كە سىلتەمە جاساپ.

ونىڭ ىشىندە پرايم پلازا كەشەنىندە بولعان تىڭدارمان نارازىلىعى، كەلىسپەۋشىلىك بولعان ساتتەر، سونداي-اق، اناسىنىڭ ءانشىنى بەيتانىس جانداردان قورعاۋ ماقساتىندا ارپالىسىپ جاتقانى جانە بالاسىنىڭ جەتىستىكتەرى تاسپالانعان.

جەلى قولدانۋشىلارى "قايرات اعا ەڭبەكقور، الدىندا باسىمدى يەمىن"، "ءىنىم، سەن تالانتتى ءانشىسىڭ، باسقالار سياقتى ماقتانىپ كەتپەيسىڭ"، "كورىپ وتىرعاندارىڭىزداي، قايرات تا، اناسى دا بۇل جەتىستىككە كوپ قيىنشىلىق پەن ەڭبەك ارقىلى جەتكەن"، "اللا امان ساقتاسىن!" دەگەن جىلى، جاعىمدى پىكىرلەر قالدىرعان.

ۆيدوعا گۇلزيرا ايداربەكوۆا "جارالى جاننىڭ ءانى بۇل" اتتى ءاننىڭ تومەندەگىدەي ءماتىنىن جازعان ەكەن:

«كۇندەستىك دەگەن قوڭىراۋ سوڭىمنان ەرىپ ءالى ءجۇر.
سىناعى شىعار ءالى بۇل،
سابىرمەن كۇتىپ سوڭىندا، جەڭەمىن ءبارىن ءبارىبىر.
بۇل مەنىڭ سىرىم اق قارداي، اقپاندا جاۋعان مەن ءۇشىن.
ورالماي وتكەن شاقتارعا، ارقالاپ ارمان جەڭىسىن.
قايراتىم تاسىپ جاتقانداي، اق جۇرەك انا – سەن ءۇشىن.
جارق ەتەم ءالى اق تاڭداي، جەڭىلگەندەرىم جەڭىسىم!
اسۋلار الار الدىمدا، باسپالداق ءومىر ءالى بۇل.
تىلەگىن ايتار ەل باردا، جۇرەگىم ايتار ءالى جىر،
جاراتقان يەم سەن باردا، جەڭەمىن ءبارىن ءبارى ءبىر!»