تۇرىك باسشىسى رەجەپ ەردوعاننىڭ پەتەربورعا بارىپ، پۋتينمەن كەزدەسۋى، ەكى ەلدىڭ اراسىنداعى قارىم-قاتىناستىڭ قايتا جاندانۋى ب ا ق پەن ساراپشىلار اراسىندا قىزۋ تالقىلانۋدا. بىرەۋلەر ەردوعاننىڭ رەسەي الدىندا «ءيىلۋىن» ەرلىككە بالاپ، ەلىنىڭ مۇددەسى ءۇشىن جاسالعان قادام دەسە، ەندى ءبىرى ونى جارتى الەمگە جەكسۇرىن بولعان پۋتينمەن وداقتاستى دەپ ايىپتاۋدا. ەكونوميست، ساياساتكەر مۇحتار تايجاننىڭ ەردوعان مەن ءپۋتيننىڭ سوڭعى كەزدەسۋىنە قاتىستى ءوز ويى بار. ول قايتا جاندانعان ەكى ەل قاتىناسىنان ەردوعاننىڭ، سول ارقىلى تۇركيانىڭ ۇتارى كوپ دەپ سانايدى.

«ەردوعاننىڭ ءبىر عانا ماقساتى بار. ول رەسەيمەن جاقىنداسۋ ارقىلى اقش-قا شانتاج جاساۋدى، ءسويتىپ ول جاقتان گۇلەندى الدىرۋدى جانە ەۋرووداق پەن تۇركيا اراسىنداعى ۆيزالىق رەجيمدى جويۋدى عانا ويلاپ وتىر»، - دەيدى م. تايجان. ەكونوميست ەردوعاننىڭ بۇگىنگى جۇيكەسىنىڭ جۇقارىپ جۇرگەنىن تۇركياداعى توڭكەرىس ارەكەتىنە بايلانىستى 300-گە جۋىق ادامنىڭ زارداپ شەگۋىمەن تۇسىندىرەدى،

م. تايجاننىڭ ويىنشا، ەردوعان قانشا اشۋعا بەرىلسە دە ەۋرووداق پەن اقش-تى رەسەيگە اۋىستىرا قويمايدى.

«ول سونشالىق دەڭگەيدە اشۋشاڭ ەمەس. الەمدىك جانە وزىق تەحنولوگيالى ىشكى جالپى ءونىمنىڭ 60 پايىزىن ول 2 پايىزدىق شيكىزاتقا نەگىزدەلگەن ىجو-گە، 1 ميللياردقا جۋىق باي دا، تولەم قابىلەتى زور نارىقتى 140 ميلليون كەدەيگە ايىرباستامايدى. 60 ميللياردتىق قانا بيۋدجەتى بار، قۇر داراقىلىققا قۇرىلعان رەسەي اسكەرىمەن وداقتاسىپ، ءتارتىبى مەن تەحنولوگياسىنداعى ايىرماسى جەر مەن كوكتەي، الەمدەگى ەڭ كۇشتى، شىعىنى 1 تريلليون دوللاردان اساتىن اسكەري بلوكتان الىستاۋ دا ويى جوق»، - دەيدى ول ەردوعاننىڭ پۋتينمەن جاقىنداسۋى تۋرالى.

ساياساتكەر رەسەي مەن تۇركيا اراسىندا كوپتەگەن ساياسي ماسەلەلەرگە قاتىستى دا الشاقتىق بار ەكەنىن العا تارتادى.

«رەسەي مەن تۇركيانىڭ مەملەكەتتىك مۇددەلەرىندەگى الشاقتىق تا ەشقايدا كەتكەن جوق. سول قالپى. سيريا، قىرىم (تاتارلار ماسەلەسى)، ارمەنيا، ءازىربايجان-قاراباق، ۋكراينا، قارا تەڭىز، باسقا دا بۇعازدار – وسىلاردىڭ بارلىعىندا انكارا مەن ماسكەۋدىڭ ۇستانىمدارى قاراما-قايشى. تاريحتا تۇرىكتەر مەن ورىستار اراسىندا 12 سوعىستىڭ بولۋى تەگىننەن تەگىن ەمەس»، - دەگەن م. تايجان ەكى پرەزيدەنتتىڭ اراسىنداعى كەلىسىمدەردىڭ جۇزەگە اسۋىنا دا بريۋسسەلدىڭ ىقپالى ساقتالاتىنىن ايتادى.

ساياساتكەردىڭ ويىنشا، پەتەربور ساپارىنان ەردوعاننىڭ ۇتقانى كوپ كورىنەدى.

«ەردوعاننىڭ ۇتقان جەرى كوپ: جاڭا قۇرىلىستار، انتالياعا ۇشاتىن چارتەرلەر، ساۋدا سانكسيالارىنىڭ الىنىپ تاستاۋى، تۇركيا اعىنى. ءبىراق، پۋتين ەردوعاننىڭ ۋاقىتشا جاعدايىنا ماستانىپ، ۋكراينا مايدانىنداعى ءوز كۇشىن تىم اسىرا باعالاپ وتىر. ۋكرايناعا اۋىز سالامىن دەپ، ءتىسىن سىندىردى، كوپ نارسەنى جوعالتتى. كەزەكتى تامىز افەراسى دا ساتسىزدىكپەن اياقتالادى»، - دەيدى م. تايجان.