قارا ورامالمەن بەتىن جاۋىپ، ازىق-تۇلىك دۇكەنىنەن شىققان كەلىنشەك ءوز ءومىرى تۋرالى ايتىپ بەرۋدەن باس تارتقان جوق. تەك جەكە باسىنا قاتىستى جايتتاردى جاريالاماۋدى ءوتىندى، - دەپ جازادى Nur.kz.
«مەن پاك ءدىن يسلام تۋرالى، ناماز تۋرالى ەشتەڭە ايتقىم كەلمەيدى. ول تۋرالى ايتۋعا حاقىم دا جوق. تەك مەن ءوزىمنىڭ قالاي نامازحان بولعان كەزىمدى ايتىپ بەرەيىن. 2008 جىلى قالادا ۇزىن كويلەك كيگەن قىزدار كوبەيىپ كەتتى. ولارعا قىزىعىپ تا، جەك كورىپ تە قارامادىم. تەك جاس قىزداردىڭ ورامال تاققانىنا تاڭ قالاتىن ەدىم. ءبىر كۇنى ءوزىم دە سونداي بولامىن دەگەن وي كەلگەن ەمەس. كافەدە ءبىر جىگىتپەن تانىستىم. ول جىگىتپەن سويلەسىپ جۇردىك، ۇناپ قالدى. ءسوزى ءتۇزۋ، يمان ءجۇزدى بولىپ كورىندى. ءبىر جىلداي ارالاسقاننان كەيىن «ايەلىم بولشى» دەپ ۇسىنىس جاسادى. ول كەز مەنىڭ ەڭ باقىتتى شاعىم ەدى، قاتتى قۋاندىم. مۇمكىن ەسسىز سەزىمدى باسىمنان كەشىرگەن شىعارمىن. ءبىراق جىگىت ماعان ورانىپ جۇرۋگە شارت قويدى. مەن كيىنسەم، باسىما ورامال تاقسام عانا وزىنە ايەل ەتە الاتىنىن ايتتى. قورقىنىش، قوبالجۋدىڭ بارلىعىن وعان دەگەن سەزىمىم باستى»، - دەيدى ايدانا.
وتكەن ءومىرى تۋرالى ايتىپ بەرگەن كەلىنشەك ءبىر ادامعا ەكى رەت رەت تۇرمىسقا شىققان.
«ءبىر كۇندە ۇزىن كويلەك تە كيدىم، ورامال دا تاقتىم. اپىر-توپىر توي بولدى. العاشىندا ونىڭ اتا-اناسىمەن تۇردىق. ونىڭ ۇيىندە ناماز وقيتىن ادام جوق. ولار باسىندا مەنىڭ ورامال تاعىپ، جامىلىپ كەلگەنىمدى جاقتىرماي ءجۇردى. كەيىن جاقسى ارالاسىپ كەتتى. جولداسىم تۋىستارىمەن سويلەسىپ، مەنىڭ يمانىمنىڭ السىرەپ كەتكەنىن ايتتى دا، پاتەرگە شىعىپ كەتتىك. ول مەنىڭ مۇسىلمان قىزدارمەن كوبىرەك ارالاسۋىمدى قالادى. ونىمەن قوناققا ەرىپ بارعان كەزدە قارا نيكاب كيگەن قىزدى العاش رەت كوردىم. جولداسىمنىڭ تۇراقتى جۇمىسى بولعان جوق بال، تمين ساتىپ ءجۇردى. ءبىر كۇنى دۇكەننەن كەلگەنىمدە جولداسىم «سويلەسۋىمىز كەرەك» دەپ بولمەگە شاقىردى. «مەن ساعان رۇقساتسىز دۇكەنگە بارعانىڭ ءۇشىن تالاق ايتىپ ەدىم. بۇل سەنىڭ ءۇشىنشى تالاعىڭ، سوندىقتان اجىراسۋىمىز كەرەك»، - دەپ قاراپ تۇر. بويىم مۇزداپ كەتتى. تەك جىلاي بەردىم، سەبەبى مەنىڭ اياعىم اۋىر بولاتىن. بىرگە تۇرعانىمىزعا ءتورت ايداي ۋاقىت بولدى»، - دەيدى ول.
ايداناعا جولداسى تالاق ايتقاننان كەيىن التى اي بويى بىر-بىرىمەن جاقىنداسپاي، سول ۇيدە تۇرۋ كەرەكتىگىن ايتقان.
«كوندىم، اشۋى باسىلىپ، اجىراسپايتىن شىعارمىز دەپ ويلادىم. سەبەبى التى اي تۇرعاننان كەيىن بوساناتىن ۋاقىت تا جاقىنداپ قالدى. ءبىراق «سەن كەتۋىڭ كەرەك» دەپ التى ايدان كەيىن مەنى ۇيىمە اپارىپ تاستادى. تەك جىلاي بەردىم. بۇرىنعى جولداسىم مەنىمەن اجىراسقاننان كەيىن ءبىر اپتانىڭ ىشىندە باسقا ايەلگە ۇيلەنگەن. سول كەزدە ەڭسەمدى بىرەۋ اياعىمەن ەزىپ جاتقانداي كۇي كەشتىم. ىشىمدەگى «بالا كىمگە كەرەك، مەن نە ىستەپ ءجۇرمىن» دەپ جىلاي بەردىم. سول كەزدە ەرتەرەك بوسانىپ قالدىم. شىعارىپ الۋعا جولداسىم ەكىنشى ايەلىن الىپ كەلدى. مەنەن كەيىن ۇيلەنگەنىن سول كەزدە ايتتى. مەنىڭ تۋىستارىم كۇيەۋىمە ۇرىسىپ، قۋىپ جىبەردى. وسىلايشا، كۇيەۋگە شىققانىممەن بالا تۋعان كەزدە جالعىزباستى انا اتاندىم. ونىڭ قانشالىقتى قيىن ەكەنىن سەزىنگەن ادام عانا بىلەدى»، - دەيدى ايدانا.
ول بالاسىن جاستان اسقانشا ءوزى تاربيەلەگەن. بۇرىنعى جولداسى اي سايىن كەلىپ، بالاسىنا قاجەتتى زاتتاردى الىپ بەرىپ وتىرعان.
"ءبىر كۇنى بالاسىنا كەلگەندە ول ماعان «قايتا قوسىلايىق» دەپ قاراپ تۇر. ساسقانىمنان «سەنىڭ ايەلىڭ بار ەمەس پە» دەي بەرىپپىن. "ونىمەن اجىراسىپ كەتتىم. ءبىزدىڭ ارامىزدا بالامىز بار، قايتا قوسىلعانىمىز دۇرىس بولادى. تەك سەن مەنىمەن قوسىلۋ ءۇشىن باسقا اداممەن نەكەلەسۋىڭ كەرەك. سوندا عانا ءبىز بىرگە بولا الامىز"، - دەگەندە توبەمنەن جاي تۇسكەندەي بولدى. ونىڭ ايتقان ۇسىنىسىنا باسىندا شوشىپ قاراپ، جانىما جولاتپاعانىممەن، تۇبىندە سولاي جاسادىم. ءوزى تانىستىرىپ، مەنى بىرەۋگە كۇيەۋگە شىعاردى. كۇيەۋىمە قايتا قوسىلۋدى ارمانداپ ءجۇردىم، العاشقى ادامىم بولعان سوڭ وعان دەگەن سەزىمىم باسقاشا بولدى. ول اداممەن التى اي بىرگە تۇرىپ، كۇيەۋىممەن قايتا قوسىلدىم. ءبىراق سەزىمىمىز باسىلىپ قالعان. ول ماعان ءبىرتۇرلى قارايدى. "بىردەڭە بولسا ول سياقتى ەمەسپىن بە، ۇناماي جاتىر ما؟"، - دەپ ءتيىسىپ شاعا كەلەدى. نە كەرەك «سەن تاعى ءۇش رەت تالاق الدىڭ» دەپ مەنى قايتا ۇيىمە اپارىپ تاستادى،" -دەيدى كەلىنشەك.
ايدانا ۇيىندەگىلەردەن قورلانعانىنان پاتەرگە شىعىپ كەتكەن. ەكى جىلدان بەرى مۇسىلمان قىزدارمەن بىرگە پاتەر جالداپ تۇراتىنىن ايتادى.
«تالاق» دەگەن ءسوزدى ەستىگەن سايىن جانىم شانشىلىپ، ەڭسەم ەزىلەدى. ءار احيعا ايەل بولىپ، حيدجاب كيگەن كوبەلەككە اينالعانىمدى ويلاسام، دەنەمنەن جيىركەنەمىن. ءبىراق يسلام جالعىز قالۋدى قۇپتامايدى. كوپتەگەن باۋىرلار وزدەرىنە ايەل بولۋىمدى سۇرادى. قامقورلىقتارىنا الاتىنىن ايتادى. ءقازىر ساۋدادا جۇرگەن ءبىر باۋىرىم ۇسىنىس ايتتى. ەكى ايەلى بار، ولارمەن دە كەزدەستىم. ەندى سول كىسىنىڭ وتباسىن كەڭەيتەمىن بە دەگەن نيەتىم بار. سول كىسىنىڭ قالاۋىمەن ءقازىر كيىمىم دە وزگەردى»، - دەدى ايدانا.
