جەر كوميسسياسىنىڭ وتىرىسىندا ەكونوميست ورازالى سابدەن وسىنداي ۇسىنىس تاستادى، - دەپ حابارلايدى Qamshy.kz.

«وسى جەردى ساتۋ، جالعا بەرۋ تۋرالى اڭگىمە باستالعاندا ەكونوميكا مينيسترلىگىندەگىلەر جەردى ساتقاننان، شەتەلگە جالعا بەرگەننەن 1 تريلليون تەڭگەدەن استام پايدا تاباتىنىمىزدى ايتقان. ول سونداي كوپ اقشا ەمەس. 3 ميلليارد دوللاردىڭ شاماسى. ءقازىر وفشوردا قازاقستاننىڭ 154 ميلليارد دوللار اقشاسى جاتىر ەكەن. سول اقشانى قايتارىپ، جەرگە سالايىق.

بىزگە ەكونوميكالىق رەفورما كەرەك. ەرتە مە، كەش پە ساياسي رەفورمالار دا جاساۋ قاجەت بولادى. حالىقتىڭ 45 پايىزى ءقازىر اۋىلدا تۇرادى. بىزدە ءالى كۇنگە جەرگىلىكتى ءوزىن-وزى باسقارۋ تۋرالى زاڭ جوق. سول زاڭدى قابىلداساق، ءبىراز دۇنيە شەشىلەر ەدى.

بىلتىر «كووپەرسيالار تۋرالى» زاڭ قابىلداندى. ءقازىر وتە ناشار جۇزەگە اسۋدا. اكىمدىكتەر دۇرىس جۇمىس ىستەمەيدى، ونى پرەزيدەنت تە ايتتى. بۇل باعىتتا اۋىلشارۋاشىلىق مينيسترلىگىنىڭ اتقارار جۇمىسى كوپ. جەر رەفورماسى تۋرالى جاڭا كونسەپسيا كەرەك، جاڭا جەر كودەكسى، مەملەكەتتىك باعدارلاما قاجەت، ءتىپتى، جەردى جالعا بەرۋ تۋرالى جەكە زاڭ كەرەك شىعار. سوندىقتان، مۇمكىن باسقا فورماتتا بولار، ءبىراق، وسى كوميسسيانىڭ جۇمىسى توقتاماۋى كەرەك»، - دەدى و. سابدەن.

ول سونداي-اق، ءموراتورييدى سوزۋ تۋرالى ۇسىنىستى قولدايتىنىن جەتكىزدى.