وڭتۇستىك قازاقستان وبلىسىندا  نۇريپا قۇربانوۆانىڭ ءىز-تۇسسىز جوعالىپ كەتۋىنە كۇيەۋىنىڭ قاتىسى بار، - دەپ حابارلايدى Qamshy.kz TVK تەلەارناسىنا سىلتەمە جاساپ.

دەرەككوزدىڭ بەرگەن اقپاراتى بويىنشا ءىز-تۇسسىز جوعالعان ايەلدىڭ كۇيەۋى ونى ولتىرگەنىن مويىنداپ، ونىڭ ءولى دەنەسىن جىبەك جولى اۋىلى ماڭىنداعى كەلەس وزەنىنە تاستاعانىن ايتقان.

ەسكە سالساق، سارىاعاش اۋدانىنىڭ 27 جاستاعى تۇرعىنىن جاقىندارى تابا الماي جۇرگەنىنە التى كۇن بولدى. ونى 9 تامىزدان كەيىن ەشكىم كورمەگەن. ال نۇريپا قۇربانوۆانىڭ تۋىستارى جۋرناليستەرگە ونى كۇيەۋى ءولتىرۋى مۇمكىن دەپ بولجاپ وتىرعانىن ايتقان. ولاردىڭ ايتۋىنشا، ەرلى-زايىپتىلار ءجيى جانجالداساتىن، ال كۇيەۋى بولسا ونى ولتىرەمىن دەپ بىرنەشە مارتە قورقىتقان ەكەن.

نۇريپا قۇربانوۆا — كامەلەتكە تولماعان ءۇش بالانىڭ اناسى، ونىمەن قوسا، ءتورتىنشى بالاسىنا اياعى اۋىر ەكەنىن تۋىستارى ايتقان. بىرنەشە جىل قاتارىنان ول سارىاعاش اۋدانى اباي اۋىلىنىڭ ماڭىنداعى بازاردا كۇيەۋى ەكەۋى ساۋدا جاساعان. 27 جاستاعى كەلىنشەك شىمكەنت قالاسىنا تاۋار ساتىپ الۋ ءۇشىن كەتكەنەن قايتا ورالماعان.

جوعالعان كەلىنشەكتىڭ تۋىستارى كۇيەۋى ەكەۋى ۇنەمى ۇرىس-كەرىستە ءومىر ءسۇرىپ كەلگەنىن جەتكىزگەن. سوڭعى جانجالدان كەيىن-اق ايەل جوعالىپ كەتكەن.

اتالعان ءىس بويىنشا دەرەكتەر ءالى ناقتىلانباعان. بەلگىلىسى، ءقازىر ايەلدىڭ دەنەسى كەلەس وزەنىنەن ىزدەستىرىلىپ جاتىر.