بۇگىندە جەر شارى تۇرعىندارىنىڭ  1،8 ميللياردى جاستار. بۇل بۇۇ-نىڭ اقپاراتى بويىنشا رەكوردتىق كورسەتكىش. الەم دامۋىمەن قاتار جاستاردىڭ باسىنا تۇسكەن قيىندىقتار دا ازايماي وتىر. قازىرگى تاڭدا ونداعان ميلليون بالا مەكتەپ قابىرعاسىن كورمەيدى. ءتىپتى مەكتەپتە وقيدى دەگەن بالالاردىڭ ءوزى جەتكىلىكتى ءبىلدىم المايتىنىن حالىقارالىق ساراپشىلار ايتىپ ءجۇر. دامۋشى ايماقتارداعى جەتكىنشەكتەردىڭ 60 پايىزى وقىمايدى نەمەس جۇمىس ىستەي المايدى 500 ميلليوننان استام جاس ءار كۇن سايىن ءبىر ءۇزىم نانعا قولىن ارەڭ جەتكىزەدى. ون جاستىڭ توعىزى دامۋشى ەلدەردە تۇرادى. سونداي-اق بۇل ەلدەردىڭ كەيبىرىندە جاستار تۇرعىنداردىڭ باسىم بولىگىن قۇراپ وتىر، جۇمىسسىزدىق ماسەلەسىن شەشۋدە قيىندىقتار تۋىنداۋدا.

بۇۇ-نىڭ ەسەبى بويىنشا جاستاردىڭ سانى الداعى ۋاقىتتا دا وسە تۇسپەك. ەكونوميكالىق ورلەۋدىڭ بيىك ساتىسىنا كوتەرىلىپ، حالقى ساۋاتتى، دەنى ساۋ بولعانىن قالايتىن مەملەكەت ەڭ الدىمەن جاستاردىڭ جاعدايىنا كوڭىل ءبولۋى كەرەك. جاستارعا قامقورلىق جاساۋ تۇرعىسىنان شىعىس ازيا مەملەكەتتەرى الدا كەلەدى ەكەن. بۇۇ وكىلدەرى افريكا ەلدەرىنە ولاردان ۇلگى الۋ قاجەتتىگىن ايتۋدا. جاستارعا جەتكىلىكتى دەڭگەيدە كوڭىل بولگەن مەملەكەتتەر  الداعى 30 جىل ىشىندە جىلىنا 500 ميلليارد دولار تابىس تۇسىرە الادى.

جاستاردىڭ ماسەلەسى — جاھان ماسەلەسى. بۇۇ جىل سايىن وتكىزەتىن جاستار فورۋمىنا جينالعان جوعارى ساناتتى شەنەۋنىكتەر مەن بەلسەندى جاستار الەمنىڭ اۋقىمدى ماسەلەلەرىن تالقىلاپ، ۇسىنىستارىمەن بولىسەدى. جىل سايىن 12 تامىزدا جاستار كۇنى اتالىپ وتىلەدى. بۇۇ بۇل اتاۋلى شارانىڭ اياسىن كەڭەيتۋدى جوسپارلاۋدا.

بۇۇ-نىڭ باس حاتشىسى پان گي مۋن بيىلعى مالىمدەمەسىندە جاستارعا قاتىستى ادىلەتسىزدىكتىڭ ءبىرى ولاردى قاۋىپسىزدىك ماسەلەلەرىمەن اينالىسۋدان شەتتەتۋ ەكەندىگىن اتاپ ايتتى. سونىڭ ايقىن مىسالى، كوپتەگەن جاستار مايدان الاڭىندا قازا تابۋدا. وسىدان ءۇش جىل بۇرىن بۇۇ-نىڭ قاۋىپسىزدىك كەڭەسى 2250 رەزوليۋسياسىن قابىلداۋ ارقىلى بىتىمگەر جاستاردى قولداۋدى ۇسىنعان. ءبىراق مەملەكەت باسشىلارى دوڭگەلەك ۇستەل باسىندا بەيبىتشىلىكتى تالقىلاعاندا جاستاردىڭ پىكىرى ەسكەرىلمەي قالاتىنى وكىنىشتى.

باس حاتشى، سونداي-اق بوسقىندار اراسىندا جاستاردىڭ كوپ بولۋىنا الاڭدايتىنىن جەتكىزدى. بۇگىندە الەمدە 70 ميلليون ادامنىڭ جۇمىسسىز ەكەنىن ەسكە سالعان پان گي مۋن اۆستريانىڭ بۇرىنعى كانسلەرى ۆەرنەر فايماندى جاستاردى جۇمىسقا ورنالاستىرۋ جونىندەگى ارنايى وكىل ەتىپ تاعايىنداعانىن مالىمدەدى. جاستار تۇراقتى دامۋدىڭ باستى قوزعاۋشى كۇشى ەكەنى ءسوزسىز. 2030 جىلعا دەيىنگى بۇۇ-نىڭ تۇراقتى دامۋ باعدارلاماسىن جەمىستى جۇزەگە اسىرۋ ءۇشىن ەڭ الدىمەن جاستارعا قولداۋ كورسەتۋىمىز قاجەت.

پان گي مۋننىڭ مالىمدەمەسىندە ايتىلعانداي، بيىل بۇۇ 18 000  ۇمىتكەردىڭ ىشىنەن تۇراقتى دامۋدى جۇزەگە اسىرۋدا بەلسەندىلىك كورسەتكەن 17 كورنەكتى جاس ىرىكتەلىپ الىنباق. دۇنيەجۇزى بويىنشا وتەتىن تاڭداۋدان  ۇزدىك شىققان جاستار قىركۇيەك ايىندا بۇۇ-نىڭ عيماراتىندا بولاشاققا قاتىستى ءوز يدەيالارىن تانىستىرا الادى.

شارافات جىلقىبايەۆا