ادام قانداي ءوزى؟ ءبىلىپ بولمايسىڭ. وزگەنىڭ كەمشىلىگىن ىزدەۋگە شەبەر، ءوزىنىڭ كەمشىلىگىن كورمەيدى. وزگەنى تابالاۋعا شەبەر، ءوزىنىڭ قاتەلىگىن مويىندامايدى. وسىلاي وتەدى ءومىرىمىز. اقىن اسىلزات ارىستانبەكتىڭ مىنا ءبىر جىلى جازباسى كوپتىڭ كوكەيىنە وي سالار دەگەن پىكىردەمىز دەپ جازادى 365info.kz.

بۇرىن ماسكۇنەم بولىپ، باتپاققا باتىپ جاتاتىن ادامنىڭ ءبىر كۇندەرى تاپ-تازا، مۇنتازداي، ناماز وقىپ جۇرگەنىن كورسەك، «ءدىندار بولا قالىپتى عوي، كەزىندە قۇلاپ ءىشىپ جۇرەتىن ەدى» دەپ تابالايمىز. ونىڭ تۇزەلگەنىنە قۋانبايمىز.

…

ۇنەمى جۇمىستان قۋىلىپ، جولى بولمايتىن ادامنىڭ كۇندەردىڭ كۇنىندە ءبىر مەكەمەنىڭ باستىعى بولىپ وتىرعانىن كورسەك، كۇندەيمىز. باياعىدا جۇمىسقا تۇراقتامايتىن ەدى، شىرەنىپ باستىق بوپ قاپتى دەپ. ودان وسىنداي جەتىستىككە جەتۋ ءۇشىن نە ىستەگەنىن سۇرامايمىز.

…

بىرنەشە رەت شاڭىراق كوتەرىپ، سوڭى ىلعي اجىراسۋمەن اياقتالىپ جاتاتىن جىگىتتىڭ بەرەكەلى وتباسىنىڭ تىرەگى بولىپ، كوپ بالالى اكە ەكەنىن كورسەك، سەنبەيمىز. تالاي ايەلدىڭ وبالىنا قالىپ ەدى، مىناۋمەن قالاي تۇرىپ جاتىر ەكەن دەگەن كۇمان تۇرادى.

…

جەتىستىككە جەتۋ جولىندا ادام بالاسى سان سوقپاقتان وتەدى. سۇرىنەدى، قاۋقارى بولسا قايتا تۇرادى. بالكىم ءاپ دەگەننەن جولى بولا قويماس، ءبىراق ءومىردىڭ ءاربىر ءساتىن ساباق دەپ بىلگەن ادام ءتۇبى ءبىر ناتيجەگە جەتەرى حاق. ەشتەڭە ىستەمەگەن ادام عانا قاتەلەسپەيدى.

…

مەنىڭ وتكەنىم مەن بۇگىنىمدى، وتباسىمدى، جاي-كۇيىمدى، وسال تۇستارىم مەن ارتىقشىلىعىمدى بىلەتىندەردىڭ مىسقىلعا تولى پىكىرلەرىن وقىپ قالىپ جاتامىن. تۇسىنەم. نەسىنە جەتىسىپ اقىل ايتىپ وتىر دەگەن ەمەۋرىندى سەزىنەم.

…

ءومىر وتپەلى. مەنىڭ باسىمنان ءوتۋى مۇمكىن ەمەس دەگەن جاعدايلارعا تاپ بولعاندا، وكىنەسىڭ. كەزىندە ءوزىم دە تالايلارعا «مۇنىڭ دۇرىس ەمەس» دەپ اقىل ايتتىم. ءبىراز دوسىمنان قاتەلىكتەرىن كەشىرە الماي قول ءۇزدىم. كوبىن سىرتىنان اڭگىمەلەدىم، تابالاعان كەزدەرىم دە بولدى، جاسىرمايمىن. ءبىراق، ءومىر سەن قابىلداماعان نارسەمەن بەتپە-بەت قالدىرعاندا، ءبارى باسقاشا ەكەنىن تۇسىنەسىڭ.

…

ءومىر قاتىپ قالعان تەورەما ەمەس! ءبىر وقيعا بىرنەشە ادامنىڭ باسىنان بىردەي ءوتۋى مۇمكىن. ءبىراق شەشىمى ءار ءتۇرلى.

جازبالارىم – جاڭىلىسقان ساتتەرىمنەن العان ساباعىم. تاجىربيەم. ول دا ءومىردىڭ ءار ساتىندە وزگەرۋى مۇمكىن. ءوز ءسوزىم -وزىمدىكى. كادەڭىزگە جاراپ جاتسا — مارحابات!