حالىقارالىق اۋەسقوي بوكس فەدەراسياسى ريو وليمپياداسىندا تورەلىك ەتۋدەن شەتتەتىلگەن تورەشىلەردىڭ ءاتى-جونىن جاريالادى. شەتتەتىلگەن تورەشىلەردىڭ قاتارىندا قازاقستاندىق راحىمجان رىسبايەۆ تا بار، - دەپ حابارلايدى Qamshy.kz ازاتتىققا سىلتەمە جاساپ.

بۇعان قوسا قازاقستاندىق ۆاسيليي ليەۆيت پەن رەسەيلىك ەۆگەنيي تيششەنكو كەزدەسۋىندە جۇمىس ىستەگەن حەيرا سيدي ياكۋب (الجير)، مايكل گاللاحەر (يرلانديا) جانە حەراردو پوگگي (ارگەنتينا) دا وليمپيادادان شەتتەتىلگەن. ماريۋش گورنيي (پولشا)، ۆلاديسلاۆ مالىشيەۆ (رەسەي) جانە ميك بەيسي (ۇلىبريتانيا) دە ريوداعى وليمپيادادا جۇمىس ىستەمەيدى.

15 تامىزدا وتكەن فينالدا تورەشىلەر شەشىمىمەن رەسەيلىك تيششەنكو قازاقستان بوكسشىسى ۆاسيليي ليەۆيتتى جەڭگەن. فينالدان سوڭ جانكۇيەرلەر، حالىقارالىق باسىلىمدار مەن بوكس ساراپشىلارى تورەشىلەر شەشىمىنە نارازى بولىپ، داۋ تۋعان. ولار فينالدا ليەۆيت ايقىن جەڭگەنىن ايتىپ، تورەشىلەر شەشىمى قاتە بولعانىن سىناعان.

ال كەيىن حالىقارالىق اۋەسقوي بوكس فەدەراسياسى (AIBA) ريو وليمپياداسىندا وتكەن 239 كەزدەسۋدى cاراپتاپ، كەيبىر ناتيجەلەردىڭ تالاپقا ساي بولماعانىن مالىمدەگەن. ۇيىم كەيبىر تورەشىلەردىڭ وليمپيادادا تورەلىك ەتۋ قۇقىعىنان ايىرىلعانىن، ءبىراق كەزدەسۋ ناتيجەلەرى وزگەرمەيتىنىن دە حابارلادى.