جۇمىس توبى ءبىر ايدىڭ ىشىندە قازاق-تۇرىك ليسەيلەرىنە اۋديت جۇرگىزۋى ءتيىس، - دەپ حابارلايدى Qamshy.kz قازاقپاراتقا سىلتەمە جاساپ.
ق ر ءبىلىم جانە عىلىمي مينيسترلىگىنىڭ باسپا ءسوز حاتشىسى ايگەرىم الىبەكوۆانىڭ ايتۋىنشا، قازىرگى ۋاقىتتا جۇمىس توبى تەكسەرۋگە ءتيىستى ماسەلەلەردىڭ ءتىزىلىمى جاسالۋدا. اتالعان جۇمىس توبىنىڭ قۇرامىنا مينيسترلىكتىڭ ءبىلىم سالاسىنا مەملەكەتتىك باقىلاۋ قىزمەتىن جۇزەگە اسىرۋعا وكىلەتتى وكىلدەرى مەن باسقا دا مۇددەلى تاراپتار كىرەدى. ولار وقۋ ورىندارىنىڭ ءبىلىم بەرۋ قىزمەتىنىڭ ءبىلىم سالاسىنداعى زاڭناما تالاپتارىنا سايكەستىگىن انىقتاۋى ءتيىس.
«وقۋ ورىندارىنا قاتىستى مەملەكەتتىك باقىلاۋ شارالارى قازاقستان رەسپۋبليكاسىنىڭ كاسىپكەرلىك كودەكسىندە بەلگىلەنگەن مەرزىم شەگىندە جۇرگىزىلەتىن بولادى جانە وتىز كۇننەن اسپايدى. تەكسەرۋ ناتيجەسىندە ءبىلىم بەرۋ ۇيىمى قىزمەتىنىڭ زاڭناما تالاپتارىنا سايكەستىگى نەمەسە سايكەسسىزدىگى تۋرالى شەشىم قابىلدانادى»، - دەپ حابارلادى مينيسترلىكتەن.
ەستەرىڭىزگە سالا كەتەيىك، 15 شىلدە كۇنى ىستامبۇلدا اسكەري بۇلىك ورىن الىپ، بۇل كوتەرىلىستى «تۇرىك قارۋلى كۇشتەرىنە ەنىپ العان فەتxۋللاxشىل لاڭكەستىك ۇيىمى ۇيىمداستىردى» دەپ جاريالاندى. وسىعان وراي، قازاقستاندا قوعام اراسىندا KATEV قورىمەن قۇرىلعان قازاق-تۇرىك ليسەيلەرىنىڭ تاعدىرى تاقىرىبى قىزۋ تالقىعا تۇسە باستادى.
ال 5 تامىزدا ق ر پرەزيدەنتى نۇرسۇلتان نازاربايەۆ تۇركياعا ساپارى بارىسىندا قازاقستانداعى تۇرىك ليسەيلەرىنىڭ جۇمىسىن قازاقستان مەن تۇركيا ءبىلىم بەرۋ مينيسترلىكتەرىنىڭ ماماندارىنان قۇرىلعان بىرلەسكەن جۇمىس توبى تەكسەرەتىندىگىن ءمالىم ەتكەن ەدى.
ءسال كەيىنىرەك ق ر ءبىلىم جانە عىلىم مينيسترلىگىندە فەتحۋللاح گيۋلەنمەن بايلانىسىنىڭ بار-جوعىن انىقتاۋ ءۇشىن قازاق-تۇرىك ليسەيلەرىن تەكسەرەتىن جۇمىس توبىنىڭ قۇرىلعاندىعىن ق ر ءبىلىم جانە عىلىم ءمينيسترى ەرلان ساعادييەۆ ايتتى.
«پرەزيدەنتتىڭ تاپسىرماسىنا سايكەس، بعم جۇمىس توبى قۇرىلىپ، جۇمىسىن باستادى. ءبىز تۇرىك تاراپىمەن بايلانىستا جۇمىس ىستەيمىز. الايدا بۇل وقۋ ۇدەرىسىنە قاتىسى جوق. بۇل ءبىزدىڭ قازاقستاندىق مەكتەپتەر جانە ولار قاتاڭ تارتىپتە ەلىمىزدىڭ ستاندارتتارىمەن قىزمەت ەتۋدە. ءبىز بۇل ليسەيلەردى بىرنەشە مارتە تەكسەرگەن ەدىك. ولارعا قاتىستى ەشقانداي نارازىلىق جوق. بۇل تۇرعىدا ليسەيلەر بۇرىنعىسىنشا جۇمىستارىن جالعاستىرادى»، -دەدى مينيستر.
