قازاقستان پرەزيدەنتى تۇركيا رەسپۋبليكاسىنىڭ پرەزيدەنتى رەجەپ تاييپ ەردوعانعا گازيانتەپ قالاسىندا بولعان تەررورلىق اكتىگە بايلانىستى كوڭىل ايتۋ جەدەلحاتىن جولدادى،- دەپ حابارلايدى Qamshy.kz.

جەدەلحاتتا مەملەكەت باسشىسىنىڭ گازيانتەپ قالاسىندا بولعان تەررورلىق اكت سالدارىنان كوپتەگەن جازىقسىز ادامنىڭ قازا بولعانى جانە زارداپ شەككەنى تۋرالى حاباردى زور كۇيزەلىسپەن قابىلداعانى اتاپ وتىلگەن.

«قازاقستان تەرروريزمنىڭ كەز كەلگەن ءتۇرىن قاتاڭ ايىپتايدى، جازىقسىز قان توگۋدى اقتاۋعا بولمايدى دەپ سانايدى. تەرروريزمنىڭ تامىرىنا بالتا شابۋ – الەمدىك قوعامداستىق ءۇشىن ەڭ باستى ماسەلە. XXI عاسىردىڭ ىندەتىنە قارسى كۇرەستە ءبىز باۋىرلاس تۇرىك حالقىمەن بىرگەمىز»، – دەلىنگەن جەدەلحاتتا.

نۇرسۇلتان نازاربايەۆ قايعىعا ورتاقتاسا وتىرىپ، بارشا قازاقستاندىقتاردىڭ جانە جەكە ءوزىنىڭ اتىنان ر.ەردوعانعا، قازا بولعانداردىڭ وتباسىلارىنا جانە جاقىندارىنا، سونداي-اق بارشا تۇرىك حالقىنا كوڭىل ايتتى.

ەلباسى زارداپ شەككەندەردىڭ تەزىرەك ساۋىعىپ كەتۋىنە تىلەكتەستىك ءبىلدىردى.