وبلىس ورتالىعى وسكەمەن قالاسىندا 7 كوپقاباتتى ۇيدەن تۇراتىن جاڭا شاعىن اۋدان اشىلماق. «نۇرلى جول» باعدارلاماسى اياسىندا «سامرۇق قازىنا» جىلجىمايتىن مۇلىك قورى» اق قولداۋىمەن بوي كوتەرەتىن ۇيلەردىڭ بۇگىن ىرگەتاسى قالاندى،- دەپ حابارلايدى Qamshy.kz.

جىبەك جولى داڭعىلىنىڭ بويىنشا سالىناتىن جاڭا اۋداندا جالپى سانى 325 پاتەر بولادى دەپ جوسپارلانعان. العاشقى كەزەكتە توعىز قاباتتى 3 ءۇي بوي كوتەرەدى. ال تۇرعىندارعا قولايلىلىق تۋعىزۋ ماقساتىندا ۇيلەردىڭ ءبىرىنىڭ ءبىرىنشى قاباتىندا 75 بالاعا ارنالعان شاعىن ورتالىق اشىلادى.

سونىمەن قاتار، قۇرىلىسشىلاردىڭ ايتۋى بويىنشا، اۋداننىڭ جوباسىن قۇرۋ بارىسىندا شقو اكىمى دانيال احمەتوۆتىڭ ۇسىنىسى ەسكەرىلىپ، ءاربىر ءۇيدىڭ جەرتولەسىندەگى اۆتوتۇراق ءىشى كەڭ بولماق. اۋدان قۇرىلىسىنىڭ ءبىرىنشى بولىگى 2018 جىلى اياقتالادى. 

– سالىنىپ جاتقان ۇيلەردىڭ باعاسى نارىقتاعى پاتەر باعاسىنان تومەن بولادى. بۇل جەردە تەك پاتەرلەر ەمەس، كوممەرسيالىق مەكەمەلەر دە اشىلادى. الاڭدى تولىقتاي اباتتاندىرىپ، پاتەر يەلەرىنە قولايلى جاعداي جاساۋ دا جوسپارعا كىرگىزىلگەن، – دەدى «سامرۇق-قازىنا» جىلجىمايتىن مۇلىك قورى» اق باسشىسى باۋىرجان مامىتالييەۆ.

مامانداردىڭ ايتۋىنشا، قۇرىلىس بارىسىندا زاماناۋي قۇرىلعىلار مەن قۇرىلىس جابدىقتارى قولدانىلاتىندىقتان، تەك قۇرىلىس ساپاسىن ارتىپ قانا قويماي، ەلەكتر قۋاتىن 20%-عا دەيىن ۇنەمدەۋگە سەپتىگىن تيگىزەدى.