«الماتى پوليسەيلەرىنىڭ اتىنان» دەپ جولدانعان ءانونيمدى حاتتىڭ ۇزىندىلەرىن جاقىندا «راديوتوچكا» سايتى جاريالادى، - دەپ حابارلايدى Qamshy.kz.

رەداكسيا حات اۆتورلارى (اۆتور جالعىز بولۋى دا مۇمكىن) الماتىدا 18 شىلدە كۇنى بولعان قىرعىنعا بايلانىستى الماتى قالاسى ءىىد باستىعى گەنەرال-مايور سەرىك كۇدەبايەۆتى جاۋاپسىز ءارى بىلىكسىز، رۋسلان كۇلىكبايەۆقا قاتىستى دالەلدەردى بۇرمالادى دەپ ايىپتاعانىن جازادى.

«ءبىزدىڭ ارىپتەستەرىمىزدىڭ قىلمىسكەر العاشقى قىلمىسىن جاساعان – ايەلدى ولتىرگەننەن كەيىن ءىىد-نىڭ بارلىق جەكە قۇرامى اقپاراتتاندىرىلماعانىنان، ءتيىستى باعىتتامالار (وريەنتيروۆكا) جولدانباعاندىقتان، سونىڭ سالدارىنان قىلمىسكەر قالادا ەمىن-ەركىن ءجۇرىپ، ونى ۋاقىتىندا ۇستاۋ شارالارى قولدانىلماعاندىقتان قازا بولعانىن قانشا قيىن بولسا دا مويىندايمىز. ءىىد مەن المالى ءاىىب كەزەكشى ءبولىمى جەكە قۇرامعا اىىب-گە شابۋىل جاسالعانى تۋرالى حابارلاماعان، ال، المالى ءاىىب باسشىلىعى قورقاقتىق تانىتىپ قانا قويماي، وزدەرىنىڭ قىلمىستىق ارەكەتسىزدىگىن جاسىرۋ ءۇشىن وقيعانىڭ بارلىق فاكتىلەرى مەن ۋاقىت تىزبەگىن بۇرمالادى»، - دەلىنگەن حاتتا.

18 شىلدە كۇنى الماتىدا بولعان قاندى قىرعىنعا قاتىستى رەسمي مالىمەت تاراعاندا، وندا قاندى قىلمىس جاساۋ ءۇشىن بار بولعانى 24 مينۋت ۋاقىت جۇمسالعانى ايتىلعان بولاتىن. ەلدىڭ كۇمانىن تۋعىزعان دا وسى ۋاقىت فاكتورى ەدى. ال، اۋداندىق پوليسيا باسقارماسىنىڭ وزىندە بولعان اتىستىڭ ناقتى قانشا ۋاقىتقا سوزىلعانى تۋرالى ەشبىر جەردە رەسمي اقپارات تارامادى. حات اۆتورلارى دا كوپتىڭ كوڭىلىندەگى كۇدىكتى ءدوپ باسىپتى.

«نەگىزى ر. كۇلىكبايەۆ ءبىزدىڭ مينيستر ەسەبىندە ايتىلعان ۋاقىتتان الدەقايدا ەرتە شابۋىل جاساعان. الدىمەن عيماراتقا كىرەبەرىستە پوليسيا ارداگەرى ك. ساتىمقۇلوۆتى، سوسىن كۇزەت بەكەتىنە كىرىپ، وندا تۇرعان پوليسيا قىزمەتكەرى م. راحماتۋللايەۆتى اتىپ ءولتىرىپ، قارۋىن تارتىپ العان جانە تاعىلىمدامادان ءوتىپ جۇرگەن پوليسەيدى جارالاعان، سودان كەيىن بارىپ، جايباراقات ءاىىب عيماراتىنا كىرگەن»، - دەپتى حات اۆتورلارى.

«راديوتوچكا» قىلمىستىڭ وسى ساتىندە بولعان كارتينانى تولىق قالپىنا كەلتىرۋ ءۇشىن سىرتقى بەينەباقىلاۋ كامەرالارىنىڭ ۆيدەوجازبالارىمەن تانىسۋ مۇمكىندىگى بولماي وتىرعانىن جازادى.

حات اۆتورلارى الماتىنىڭ باس پوليسەيىن سونىمەن قاتار، ر. كۇلىكبايەۆتىڭ قولىنان قازا بولعان پوليسەيلەردىڭ جانازاسىنا بارمادى، جاراقات العان ارىپتەستەرى جاتقان اۋرۋحانالارعا باس سۇقپادى دەپ ايىپتايدى.

«ءبىزدىڭ گەنەرال ءتىپتى قازا بولعان ارىپتەستەردى جەرلەۋ راسىمىنە بارۋعا، سپورت سارايىندا وتكەن ازاماتتىق جانازاعا قاتىسۋعا، مارقۇمداردىڭ تۋىستارى مەن جاقىندارىنا كوڭىل ايتۋعا، جارالانعانداردىڭ كوڭىلىن سۇراپ، اۋرۋحاناعا بارۋعا ۋاقىت تاپپادى. مينيستر ق. قاسىموۆتىڭ جاراقاتتانعاندارعا بارماي، قازا بولعان ارىپتەستەردىڭ تۋىستارى مەن جاقىندارىنا كوڭىل ايتپاي، دەمالىسقا اسىققانى وكىنىشتى. بۇل جانە ءىىم-نىڭ بارلىق جەكە قۇرامى قاتەردىڭ «سارى» دەڭگەيى جاعدايىندا كۇشەيتىلگەن رەجيمدە قىزمەت وتەپ جاتقان ساتتە بولىپ وتىر»، - دەگەن حات جازۋشىلار.

سايت جۋرناليستەرى ءانونيمدى حات جازۋشىلاردى انىقتاۋعا ارەكەت ەتىپ كورگەن. الايدا، ازات تاراقوۆ دەگەن حات جولداۋشى رەداكسيا ساۋالدارىن جاۋاپسىز قالدىرعان. ءانونيمدى حاتقا قاتىستى پىكىرىن ءبىلۋ ءۇشىن الماتى قالاسى ءىىد باسشىسىن ىزدەگەندە، ونىڭ شىنىمەن دە قىزمەتتىك دەمالىسقا كەتكەنى، ورنىنا ءبىرىنشى ورىنباسارى پولكوۆنيك قانات تايمەردەنوۆتىڭ قالعانى بەلگىلى بولعان. ق. تايمەردەنوۆ ءوز باسشىسىنا قاتىستى حاتقا قانداي دا ءبىر پىكىر بىلدىرۋدەن باس تارتىپ، ىىم-گە حابارلاسۋعا كەڭەس بەرگەنن. ال، ءىىم-نىڭ وكىلى الماس سادۋبايەۆ ەكى كۇن وتكەن سوڭ رەداكسياعا قر-نىڭ «جەكە جانە زاڭدى تۇلعالاردىڭ وتىنىشتەرىن قاراۋ ءتارتىبى تۋرالى» زاڭنىڭ 5-بابىنا سايكەس، اتالعان حاتتىڭ قاراستىرۋعا جاتپايتىنىن حابارلاعان.

وسىلايشا، شۋلى ىسكە قاتىستى كوپتەگەن كۇدىك تۋعىزاتىن ايىپتاۋلارعا تولى حاتتىڭ اۆتورىن انىقتاۋ مۇمكىن بولماعان. مۇنداي حاتتىڭ باق-قا تارالۋىندا دا ءمان جاتىر. زاڭعا سايكەس، ءانونيمدى حابارلامالار ەشبىر مەملەكەتتىك ورگاندا رەسمي تۇردە قارالمايدى، زەرتتەلىپ، تەكسەرىلمەيدى. مۇنداي حاتتاردان قانداي دا ءبىر ناتيجە كۇتۋ دە ورىنسىز. ال، كۇشتىك قۇرىلىم قىزمەتكەرلەرىنىڭ باسشىلىعىنا قاتىستى قانداي دا ءبىر رەسمي شاعىم جاساۋى تاجىريبەدە وتە سيرەك كەزدەسەدى. سوندىقتان، بۇل حات شىنىمەن ۇجىمداعى شالاعايلىقتان شارشاعان پوليسەيلەردىڭ جانايقايى ما، الدە، شەندى-شەكپەندىلەر اراسىنداعى قانداي دا ءبىر ىشكى قاقتىعىستاردىڭ ۇشقىنى ما، ول جاعىن ءدوپ باسىپ ايتۋ قيىن.

دارحان مۇقانتەگى