وتكەن اپتاداعى ەڭ جويقىن تەرروريزم وقيعاسى تۇركيانىڭ گازيانتەپە قالاسىندا وتكەنى بەلگىلى. بۇگىنگە دەيىن بىردە ءبىر ۇيىم ءوز مويىنا الماعان  بۇل جارىلىستان 54 ادام قازا بولدى، - دەپ حابارلايدى Qamshy.kz.

اۋرۋحاناعا تۇسكەندەردىڭ 20-دان استامىنىڭ حالى مۇشكىل كورىنەدى.

بومبا تويدىڭ قىزعان ساتىندە ىسكە قوسىلعان. كۋاگەرلەردىڭ ايتۋىنشا، جارىلىس كەزىندە ادامداردىڭ دەنەسى جۇزدەگەن مەترگە دەيىن ۇشىپ كەتكەن. "وقيعا ورنىنا كەلگەنىمىزدە  ءبارى قانعا بويالىپ جاتتى. بىرەۋدىڭ قولى جوق، بىرەۋدىڭ اياعى جوق. نە بولعانىن بىردەن تۇسىنە المادىق، نە ىستەۋ كەرەگىن دە" دەيدى، يۋكسەل بويلا ەسىمدى تۇرعىن. كەيىن بەلگىلى بولعانداي جارىلىستى ءجاسوسپىرىم قىز جاساعان.

ەل پرەزيدەنتى رەدجەپ ەردوعان توي كەزىندەگى سۇمدىق تەررورلىق وقيعادان جۇزگە جۋىق ادامنىڭ جارالانعانىن، ەلۋدەن استام ادامنىڭ قۇربان بولعانىن مالىمدەدى.

كۋاگەرلەردىڭ ايتۋىنشا، جاس تەرروريست قوناقتاردىڭ سىرتقا مەيلىنشە كوپ شىعۋىن كۇتىپ تۇرىپ، بومبانى قوسقاندىعىن ايتادى. گازيانتەپە تۇرعىندارى بۇل وقيعانىڭ باسىندا تۇرعانداردى تاۋىپ جازالاۋدى تالاپ ەتۋدە.

"جاس بالا بۇلايشا وزدىگىنەن ارەكەت ەتە المايدى. بۇنى ۇيىمداستىرۋعا كوپ ۋاقىت كەتەدى. ءبىز وسىنداي وقيعالاردىڭ الدىن الۋ ءۇشىن ۇكىمەتپەن ىنتىماقتاسۋعا ءازىرمىز" دەدى، وپپوزيسيالىق پارتيا جەتەكشىسى سەلاحاتين دەميرتاش.

جىل باسىنان بەرى تۇركيادا 23 تەررورلىق وقيعا ورىن الىپ، 400-دەن استام ادامنىڭ ءومىرىن قيدى. تەرورلىق ارەكەتتەردىڭ باسىم بولىگىن «يسلام مەملەكەتى» ۇيىمداستىرعان.