ۆيسە-پرەمەر داريعا نازاربايەۆا تۇركىستان قالاسىنا جاساعان ساپارى بارىسىندا وقو تۇرعىندارى حالىق سانىنىڭ كوبەيۋىنە بەلسەندى كىرىسىپ كەتكەنى سونشالىق، مەملەكەت بالاباقشا مەن مەكتەپتەر سالىپ ۇلگەرە الماي جاتقانىن ايتتى، - دەپ حابارلايدى Qamshy.kz NUR.KZ – كە سىلتەمە جاساپ.

ۇكىمەت باسشىسى كارىم ءماسىموۆ باستاعان توپ ق.ا.ياcساۋي اتىنداعى حالىقارالىق قازاق-تۇرىك ۋنيۆەرسيتەتىندە ءبىلىم سالاسىنا قاتىستى جيىن وتكىزدى. جيىنعا جەرگىلىكتى دەپۋتاتتار مەن زيالى قاۋىم وكىلدەرى، ءبىلىم سالاسىنىڭ قىزمەتكەرلەرى قاتىستى.

باسقوسۋدا قاتىسۋشىلار ءبىلىم سالاسىنداعى ءتۇرلى پروبلەمالاردى كوتەردى. ءبىرى ساباننان سالىنعان مەكتەپتەرگە الاڭداۋشىلىق تانىتسا، كەلەسىسى ءۇش اۋىسىمدىق ءبىلىم ۇيالارىنىڭ جاعدايى مازالايتىنىن جەتكىزدى.

بەلگىلى بولعانداي، بۇگىندە وڭتۇستىك قازاقستاندا 1022 مەكتەپ بار. ونىڭ 700-تيپتىك، 300-دەن استامى ىڭعايلاستىرىلعان جانە ساباننان سالىنعان ءبىلىم ۇيالارى. وبلىس اكىمى بەيبىت اتامقۇلوۆتىڭ سوزىنە سەنسەك، الداعى ءۇش جىلدا بۇل ماسەلە وڭ شەشىمىن تابادى. ايتا كەتەيىك، جاڭا وقۋ جىلىندا وڭتۇستىكتە 25 مەكتەپ پايدالانۋعا بەرىلمەك.

جيىنعا قاتىسۋشىلار ءۇش تىلدىلىك پەن سۋيسيد جايىنا دا نازار سالدى. ايتۋلارىنشا، جىل باسىنان بەرى ايماقتا 49 مەكتەپ وقۋشىسى مەن جاستار سۋيسيدكە بارعان. جاستاردىڭ وز-وزىنە قول جۇمساۋىنا قاتىستى پىكىر بىلدىرگەن داريعا نازاربايەۆا بارلىق جاۋاپكەرشىلىكتى ۇكىمەتكە جاۋىپ قويا سالۋ دۇرىس ەمەس دەپ سانايدى.

«سۋيسيد دەپ كەتتىڭىزدەر. بارلىق جاۋاپكەرشىلىكتى ۇكىمەتكە جابۋعا بولمايدى؟ وتباسى قايدا؟ بالالار ۇيدە تۇرادى، اكە-شەشەلەرى، باۋىرلارى بار. «ومىردە نە قىزىقتىرىپ ءجۇر؟» دەپ نەگە سونداي سۇراقتاردى قويمايسىزدار؟ مۇعالىمدەر قايسىسىنا جەتەدى؟ اتا-انا ۇلكەن جۇمىس جاساۋ كەرەك» دەگەن ۆيسە-پرەمەر قازاقتا «كورشىنىڭ بالاسى» دەپ سالىستىراتىن اتا-انالاردىڭ ول ارەكەتى تەرىس تاربيە بەرەتىنىن دە جاسىرمادى. ال مەكتەپ پەن بالاباقشا تاپشىلىعىنا قاتىستى ويىن جەتكىزگەن داريعا نازاربايەۆا ەل دەموگرافياسىنىڭ ارتۋىنا وڭتۇستىكقازاقستاندىقتاردىڭ ەرەكشە ۇلەس قوسىپ وتىرعانى سونشالىق ناتيجەسىندە مەملەكەت مەكتەپ مەن بالاباقشا سالىپ ۇلگەرە الماي جاتقانىن دا ايتىپ قالدى.

بۇدان وزگە نازاربايەۆا ق.ياسساۋي كەسەنەسىندە بولعانىن جانە ونداعى تاريح تۋرالى مالىمەتتەردىڭ تەك قازاق تىلىندە جازىلعانىن سىنعا الدى.

«ءبىز ق.ا.ياسساۋي كەسەنەسىندە بولدىق. وندا بارلىق جاقتان تۋريستەر كەلەدى. وسى كەسەنەلەردىڭ تاريحى بار جەردە قاراساڭىزدار تەك قازاق تىلىندە جازىلعان. نەگە؟ مۇندا ورىستار، شەتەلدىك تۋريستەر كەلمەسىن دەيسىزدەر مە؟ دۇرىس ەمەس ول»، – دەپ ويىن جەتكىزگەن ۆيسە-پرەمەر ءۇش ءتىلدى مەڭگەرۋ ەل ابىرويىن شەتەلدىكتەر الدىندا اسقاقتاتىپ جىبەرەدى دەگەن سەنىمدە.