ادامزات بالاسى بۇگىندە بالامالى ەنەرگيا كوزدەرىن دامىتۋعا بەت بۇردى: جەل، كۇن ەنەرگياسىن كادەگە جاراتا الساڭىز، ونىڭ پايداسى كوپ-اق. الەم ەلدەرى بۇرىننان-اق مۇنداي ەنەرگيانىڭ پايداسىن كورىپ كەلەدى. جاڭا عاسىرداعى جاڭا يگىلىكتەردى پايدالانۋدا بىزدە دە بەتبۇرىس بار. جەر-جەردە كۇن، جەل ەنەرگياسىن وندىرەتىن ستانسالار سالىنىپ جاتقانى ءمالىم. بۇگىندە شىمكەنتتىڭ ورتالىق كوشەلەرىنىڭ بويىنا كۇن ساۋلەسىنەن قۋات الاتىن قوندىرعىلار ورناتىلا باستادى. اسىرەسە، جاياۋ جۇرگىنشىلەر وتكەلدەرىن جاڭعىرتۋدا مۇنداي جوبانىڭ پايداسى كوپ بولىپ تۇر.ەل ۇكىمەتى «جاسىل ەكونوميكاعا» كوشۋدىڭ تەتىكتەرىن قاراستىرىپ جاتقانى دا راس. كەلەسى جىلى وتەتىن «ەكسپو 2017» حالىقارالىق كورمەسى دە وسى تاقىرىپتى ارقاۋ ەتىپ وتىر.

جۋىردا سوزاق اۋدانىندا كۇن ساۋلەسىنەن ەلەكتر ەنەرگياسىن وندىرەتىن ستانسيا سالىناتىنى ءمالىم بولدى. جوبانى ىسكە اسىرۋعا گەرمانيالىق «Green Energy 3000 Holding» كومپانياسى نيەت تانىتقان. اۋدان اكىمدىگىنىڭ باسپا ءسوز قىزمەتى حابارلاعانداي، ستانسيانىڭ قۇرىلىس جۇمىستارى وسى جىلدىڭ قاراشا ايىندا باستالادى. كەلەر جىلى تولىق قۋاتىمەن جۇزەگە اساتىن جوبادا 50 ادام جۇمىسپەن قامتىلماق. جوسپار – 50 مۆت ەلەكتر ەنەرگياسىن ءوندىرۋ، ال جوبانىڭ تۇتىنۋشىسى «KEGOC» اق بولماق. 
جاڭا يننوۆاسيانىڭ يگىلىگى كوپ. اسىرەسە، بۇل تەحنولوگيانى جىل بويى كۇننىڭ كوزى ىسىپ تۇراتىن وڭتۇستىكتە دامىتۋ قولايلى. بۇگىندە قالاداعى جاياۋ جۇرگىنشىلەر وتكەلى بويىندا كۇن باتارەيالارى ورناتىلعانىن بايقاپ ءجۇرمىز. ياعني، قاۋىپسىزدىكتى ساقتاۋ ماقساتىندا قويىلعان جول بەلگىلەرىن وسى كۇن باتارەيالارى قۋاتتاندىرادى.