وبلىس اۋماعىندا جەر كودەكسىن تالقىلاۋ جانە ءتۇسىندىرۋ جۇمىستارى جۇرگىزىلۋدە. وسى ماقساتتا اقسۋكەنت ەلدىمەكەنىندە مەملەكەت باسشىسىنىڭ ارنايى تاپسىرماسىمەن قۇرىلعان رەسپۋبليكالىق كوميسسيانىڭ مۇشەسى، «قازاق ماقتا قاۋىمداستىعى» زاڭدى تۇلعالار بىرلەستىگىنىڭ ءتوراعاسى ساين باقتىبايەۆ وڭتۇستىك تۇرعىندارىمەن كەزدەستى. رەسپۋبليكالىق كوميسسيانىڭ بۇگىنگە دەيىنگى اتقارىلعان جۇمىستارى جايلى بايانداما جاسادى.اۋداندىق قوعامدىق كەلىسىم كەڭەسىنىڭ ءتوراعاسى امانگەلدى قابىلبەكوۆتىڭ جەتەكشىلىگىمەن وتكەن ماجىلىسكە وبلىستىق ىشكى ساياسات باسقارماسىنىڭ باسشىسى بولاتبەك تولەگەن، وبلىستىق ارداگەرلەر ۇيىمىنىڭ ءتوراعاسى جەڭىسبەك ماۋلەنقۇلوۆ، وبلىستىق جەر قاتىناستارى باسقارماسىنىڭ باسشىسى سوزاقباي ءابدىقۇلوۆ جانە وبلىستىق قوعامدىق كەڭەس جانىنان قۇرىلعان جۇمىسشى توپ مۇشەلەرى قاتىستى. سونداي-اق، شىمكەنت قالاسى، سايرام، ورداباسى، تۇلكىباس، تولەبي اۋداندارىنا قاراستى شارۋا قوجالىقتارىنىڭ ءتوراعالارى دا ءوز ويىن ءبىلدىرىپ، ۇسىنىستارىن ورتاعا سالدى.
– جەردى ساتپايمىز، جالعا دا بەرمەيمىز!» دەپ شىر-پىر بولعان ەلدىكى دە ءجون. اركىم ءوز ويىن، ەلگە، جەرگە دەگەن سەزىمىن ءارقالاي بىلدىرەدى. ايتكەنمەن، «جەر كودەكسىنىڭ ماقساتى نە؟» ءبىز الدىمەن وسىنى ايقىنداپ الۋىمىز كەرەك. جەر يگەرىلمەسە، جارامسىزدىعى ارتا بەرەدى. ال ءبىر عانا ميليمەتر جەردىڭ ءوزى سورى شىقسا، مەملەكەتكە قىرۋار شىعىن كەلتىرەدى. جەردى «توزدىرماۋ» ءۇشىن ونى قالاي بولماسىن پايدالانۋ قاجەت، تىڭايتىپ وتىرۋ كەرەك، – دەگەن ج.ماۋلەنقۇلوۆ جاستارعا قۇللاققاعىس جاسادى. – ماسەلەن، سولتۇستىك قازاقستان وبلىسىندا حالىق سانى از، جەرى كەڭ. سول جەرلەردى پايدالانۋ ءۇشىن وڭتۇستىك ءوڭىرىنىڭ حالقى تىعىز ورنالاسقان ايماقتارىنان جاس وتباسىلار شاقىرىلىپ جاتىر. حالىق جەرگە، ەلگە دەگەن وتانسۇيگىشتىگىن ءبىر قادام جەرىن تىڭايتۋ ارقىلى دا كورسەتە الادى. جەر شارۋاشىلىعىنان قاشپاۋ كەرەك. «قىبىرلاعان قىر اسادى» دەگەن ءسوز بار. جاستار «اۋىر جۇمىس» دەپ قينالماسا، ءبىرتالاي بوس جاتقان جەر يگەرىلەر ەدى. بۇل ەلگە دە، وزدەرىنە دە تەك پايدا كەلتىرەدى.
رەسپۋبليكالىق كوميسسيا جەر كودەكسىندەگى وزەكتى ماسەلەلەردى ايقىنداپ، قوعامدىق تالقىلاۋدان قورىتىندى جاساپ، ۇسىنىستاردى پارلامەنتكە تاپسىراتىن بولادى. ال ەل ىشىندە جەر كودەكسىنە بايلانىستى ناقتى ۇسىنىسى بار ازاماتتار جىل سوڭىنا دەيىن ويىن ءتيىستى ورىندارعا جەتكىزۋگە مۇمكىندىگى بار.
