موڭعوليا رەسپۋبليكاسى، بايان-ولگەي ايماعىندا ورىن العان سەلدىڭ زاردابىنان 700-گە جۋىق قانداسىمىز زارداپ شەگىپ، كوبى باسپاناسىز قالعان ەدى. توتەنشە جاعدايعا كومەك قولىن سوزۋعا ەڭ العاشقىلاردىڭ ءبىرى بولىپ وڭتۇستىك قازاقستان وبلىسى اكىمىنىڭ قولداۋىمەن بەلسەندى جاستار اتسالىستى.

وبلىس اكىمدىگىنىڭ قىزمەتكەرلەرى ءبىر كۇندىك جالاقىلارىن اۋدارسا، كاسىپكەرلەردىڭ دەمەۋشىلىگىمەن 7 تونناعا جۋىق ۇن، 1 توننا ماكارون، 1000 بانكا تۇزدالعان قيار جانە كونديتەرلىك ونىمدەر، ىرىمشىك، شۇجىق، تاۋىق ەتى، باسقا دا ازىق-تۇلىك پەن 5000 دانا شۇلىق جونەلتىلدى. سونداي-اق، زارداپ شەككەن 5 وتباسىنىڭ ءۇي سالۋعا جۇمسايتىن قۇرىلىس ماتەريالدارىن وبلىس تۇرعىندارىنان جينالعان 3 ملن تەڭگە كولەمىندەگى قاراجاتپەن قامتاماسىز ەتەتىن بولدى.

– بايان-ولگەيدەگى قانداستارىمىزعا كومەك كورسەتۋدە كولىك ماسەلەسىن شەشىپ، كەدەندىك قۇجاتتاردى راسىمدەۋگە جانە باسقا دا ۇيىمداستىرۋشىلىق جۇمىستارعا وبلىس اكىمى ب.اتامقۇلوۆ قولداۋ كورسەتتى. موڭعولياداعى جاعدايدى كوزبەن كورىپ، قانداستارىمىزعا گۋمانيتارلىق كومەكتى جەتكىزىلگەنىنە ءوزىم كۋا بولىپ قايتامىن، – دەيدى «بىزبەن بىرگە» قوعامدىق قورىنىڭ ءتوراعاسى ا.اڭدابايەۆ.