شىمكەنتتە «ادەمى اۋلادا ءومىر سۇرەمىن» دەگەن تۇرعىنداردىڭ قولىن ەشكىم قاقپايدى. اينالاڭىزدى كوركەم ەتكىڭىز كەلسە، ىسكە ءسات!
ءال-فارابي اۋدانىنا قاراستى ن.راشيدوۆ كوشەسىندەگى №25 ءۇيدىڭ تۇرعىندارى ءوز اۋلالارىنىڭ اسەمدىگىنە باستى نازار اۋدارعان. ءۇش جىلدان بەرى ولار جاپىراعى جايقالعان اعاشى، ءتۇرلى ءتۇستى كوزدىڭ جاۋىن الاتىن گۇلدەرى بار اۋلادا ءومىر سۇرۋدە. تەك ەرەسەكتەرگە عانا ەمەس، سونىمەن بىرگە جاس بالاقايلار ءۇشىن دە ويىن الاڭشاسىن بەزەندىرگەن. ءبارى دە ريزا. اسىرەسە، جازدىڭ اپتاپ ىستىعىندا ادەمى كورىنىستىڭ ورتاسىندا تىنىققانعا نە جەتسىن. قاراپ وتىرساڭىز، جانىڭىز راحات تابادى. قۇددى ءبىر ەرتەگىلەر الەمىنە ساياحاتتاپ كەلگەندەي اسەردە بولاسىز. بەسقاباتتى ءۇيدىڭ بارلىق كىرە بەرىسىندە گۇل ەگىلگەن، اعاشتار مەن جاسىل شىرشالار وتىرعىزىلعان. ءبارى دە وزدەرىنە ءتان شاعىن عانا لاندشافتىمەن جانە جيناقىلىعىمەن ەرەكشە كوز تارتادى. وسى كەرەمەت يگى ىسكە باستاماشى بولعان ناتاليا فرولوۆا ەكەن. سۇلۋلىققا جانى قۇشتار زەينەتكەر كۇنى بويى اۋلالارداعى اعاشتار مەن گۇلدەردى سۋارىپ، تازالىق جۇمىستارىن جۇرگىزەدى. ءبىز بارعاندا دا ناتاليا اناتوليەۆنا اۋلاسىنداعى باقشاسىنا قاراپ ءجۇر ەكەن.
– بۇل باستاما زەينەتكە شىققان سوڭ جۇزەگە اسا باستادى. كۇنى بويى ۇيدەمىن. ودان بىرتىندەپ اۋلامىزدى كورىكتەندىرە باستادىم. اۋلامىز جايقالا باستاعان سوڭ، كورشىلەرىم دە قول ۇشىن بەردى. ءبىراق بار ماتەريالدىق شىعىندى ءوز قالتامنان شىعاردىم. باستاپقىدا وڭاي بولدى دەپ ايتا المايمىن. شەلەكتەپ توپىراق پەن تاس تاسىدىم. كوشەت قوندىردىم، گۇل وتىرعىزدىم. وتكەن جىلى «ۇزدىك اۋلا» سايىسىنا قاتىسىپ، ەكىنشى ورىندى يەلەندىك. بيىل تاعى دا قاتىسامىز دەپ ءوتىنىش بەردىك. سوعان قىزۋ دايىندىق ءجۇرىپ جاتىر. ايتەۋىر، كۇن سايىن كەم-كەتىكتى رەتتەپ ءجۇرمىن. اۋلامىز بىلتىرعىدان دا كورىكتەنە تۇسكەن، – دەيدى ن.فرولوۆا.
كوپقاباتتى ءۇي تۇرعىندارىنىڭ ايتۋىنشا، ءقازىر جايقالىپ تۇرعان اۋلالاردا كولىك ءتىزىلىپ تۇرۋشى ەدى. وعان قوسا، بالالار وينايتىن الاڭشا دا سۇرىقسىز بولاتىن. اۋلالاردى كوگالداندىرىپ بولعان سوڭ، ويىن الاڭشالارىنا دا كىرىسكەنىن جەتكىزدى. «ىستەن شىققان كولىك دوڭعالاقتارىن ءتۇرلى تۇسكە بوياپ، الاڭشانى قورشادىق، – دەيدى وسى ءۇيدىڭ تۇرعىنى كلارا مەڭدىعۇلوۆا.
– سوسىن سول دوڭعالاقتاردان ءتۇرلى اققۋدىڭ مۇسىندەرىن جاساپ، ولاردى اق تۇسكە بويادىق. بالاقايلاردىڭ ويناۋىنا ىڭعايلى بولۋ ءۇشىن بارىمىزدى سالدىق. وسىندا ونعا جۋىق زەينەتكەر تۇرامىز. ەرمەگىمىز – وسى اۋلامىز. ءبىزدىڭ باستامامىزعا كورشى ءۇيدىڭ تۇرعىندارى دا قىزىعىپ، ولار دا اۋلالارىن كورىكتەندىرە باستادى».
راشيدوۆ كوشەسى، №25 ءۇيدىڭ تۇرعىندارى بيىل وتەتىن «ۇزدىك اۋلا» سايىسىندا ءبىرىنشى ورىن الساق» دەپ وتىر. ءال-فارابي اۋدانىندا وسى ءۇي سەكىلدى «سىننان سۇرىنبەي وتسەك» دەگەندەر كوپ. ايتا كەتەر بولساق، بيىل «ۇزدىك اۋلا» جانە «ۇزدىك كوشە» نوميناسياسىنان 28 كوشە مەن 61 اۋلا تۇرعىندارى ءۇمىتتى. ال وتكەن جىلى «تازا قالا» اكسياسىنا اۋداننان جالپى 82 ءوتىنىش بەرىلىپتى.
