الماتىدا بولعان جول-كولىك اپاتى سالدارىنان ءبىر ادام كوز جۇمدى، - دەپ حابارلايدى Qamshy.kz قازاقپاراتقا سىلتەمە جاساپ.

جول اپاتى مەدەۋ اۋدانىندا حاليۋللين مەن نابەرەجنايا كوشەلەرىنىڭ قيىلىسىندا بولدى. كۋاگەرلەردىڭ ايتۋىنشا، نابەرەجنوە كوشەسىندە ءۇش ەر ادام Nissan Terrano ماركالى اۆتوكولىگىنەن تاڭقۋراي سالىنعان جاشىكتەردى «گازەل» كولىگىنە ارتىپ جاتقان. وسى ساتتە حاليۋللين كوشەسىنەن ۇلكەن جىلدامدىقپەن شىعا كەلگەن جول تالعامايتىن Range Rover اۆتوكولىگىنىڭ جۇرگىزۋشىسى باسقارۋعا يە بولا الماي، Nissan كولىگىنە بارىپ سوعىلادى.

سوققى سالدارىنان Nissan كولىگى «گازەل» كولىگىنە، ال «گازەل» قاسىندا تۇرعان Daewoo Matiz جەڭىلاۆتوكولىگىنە بارىپ سوعىلدى.

اپات سالدارىنان «گازەل» كولىگىنىڭ جۇرگىزۋشىسى وقيعا ورنىندا كوز جۇمدى. تاعى ءبىر ادام ەكى اياعى سىنىپ، اۋرۋحاناعا جەتكىزىلدى.