بۇۇ-نىڭ ادام قۇقىقتارى جونىندەگى جوعارعى كوميسسارى زەيد رااد ال-حۋسەين  يەمەندەگى وقيعالاردى زەرتتەۋ ءۇشىن حالىقارالىق تاۋەلسىز ۇيىم قۇرۋعا شاقىردى، - دەپ حابارلايدى Qamshy.kz.

جوعارعى كوميسساردىڭ سوزىنە سەنسەك، بۇل ەلدەگى ادام قۇقىقتارى مەن حالىقارالىق گۋمانيتارلىق قۇقىقتىڭ بۇزىلعانى سونشالىق، بۇل سالادا زەرتتەۋ جۇرگىزەتىن ۇلتتىق كوميسسيا زور قيىندىقتارعا تاپ بولۋدا.

بەيسەنبى كۇنى بۇۇ-نىڭ ادام قۇقىقتارى جونىندەگى كەڭەسى يەمەندەگى جاعدايعا بايلانىستى بايانداما جاسادى. «2015 جىلدىڭ ناۋرىزىنان 2016 جىلدىڭ 23 تامىزىنا دەيىن يەمەندەگى سوعىس 3799 ازاماتتىق تۇلعانىڭ ءومىرىن قيىپ، 6711 بەيبىت تۇرعىن جارالانعان» دەپ جازىلعان باياندامادا. بۇل ەلدە از دەگەندە 7،6 ميلليون ادام، ونىڭ ىشىندە 3 ميلليون انا مەن بالا ازىق-تۇلىك تاپشىلىعىن تارتۋدا. تاعى 3 ميلليون ادام ءۇيىن تاستاپ كەتۋگە ءماجبۇر بولعان.

 بۇۇ-نىڭ ارنايى بايانداماسى «يەمەن تۇرعىندارىنىڭ تاۋقىمەتىنە شەك قويۋ — حالىقارالىق قوعامداستىقتىڭ پارىزى» دەپ تۇيىندەلگەن.