بۇگىن استاناداعى №2 ەسىل اۋداندىق سوتىندا قازاقستان جۋرناليستەر وداعىنىڭ ءتوراعاسى سەيىتقازى ماتايەۆ پەن ونىڭ ۇلى، «قازتاگ» اقپاراتتىق اگەنتتىگىنىڭ باس ديرەكتورى اسەت ماتايەۆتاردىڭ قىلمىستىق ءىسى بويىنشا سوتتىڭ ءىستى قاراۋى جالعاستى. ايىپتالۋشىلارعا «الاياقتىق جاسادى جانە سالىقتان جالتاردى» دەگەن ايىپتار تاعىلىپ وتىر. «قازاقتەلەكوم» اق-نا قاتىستى ءبىرىنشى ەپيزود بويىنشا سوتقا جاۋاپ بەرگەن «قازاقتەلەكوم» اق-نىڭ باسقارما مۇشەسى، ستراتەگيالىق باسقارۋ جونىندەگى باس ديرەكتورى باتىر ماحانبەتاجييەۆ س. ماتايەۆتىڭ جۋرناليستەر اراسىندا بەدەلدى جانە ىقپالدى ادام بولعاندىقتان ونىڭ ادالدىعىنا سەنىپ قالعانىن مالىمدەدى.

ب. ماحانبەتاجييەۆ سوتقا دەيىنگى تەرگەۋگە بەرگەن تۇسىنىگىندە 2011 جىلعا دەيىن س. ماتايەۆپەن تانىس بولماعانىن، ءبىراق ءبىر-بىرىن سىرتتاي بىلگەنىن ايتىپتى. 2011 جىلدىڭ باسىندا س. ماتايەۆ وعان حابارلاسىپ، ءوزى باسشىلىق ەتەتىن «ۇلتتىق باسپا ءسوز كلۋبى» قوعامدىق بىرلەستىگىنە تەندەردە ءتۇزۋ نيەتپەن قاراۋعا ءوتىنىش جاسايدى. «اڭگىمە بارىسىندا ول 2007 جىلدان بەرى «قازاقتەلەكومنىڭ» قىزمەتى تۋرالى ماتەريالداردى باق-دا جاريالاپ كەلە جاتقانىن، سول ۋاقىتتان بەرى ەشقانداي دا ماسەلە تۋىنداماعانىن ايتتى. مەن بۇعان دەيىن س. ماتايەۆتى سىرتتاي تانيتىنمىن. جوعارى لاۋازىمدى قىزمەتتەردى اتقارعانىن، ونىڭ جۋرناليستەر اراسىندا اسا بەدەلدى جانە ىقپالدى ادام ەكەنىن دە بىلەتىنمىن. سول سەبەپتەن وتىنىشىنە قۇلاق استىم. س. ماتايەۆقا تەندەر كەزىندە جان-جاقتى كومەك كورسەتۋگە، اتقارىلعان جۇمىستار تۋرالى اكتىگە قول قويۋعا، دەر كەزىندە اقشا تولەۋگە جانە باسقا ماسەلەلەردى شەشۋگە ۋادە بەردىم» دەدى ول سوتقا بەرگەن تۇسىنىگىندە.

كەيىنىرەك، «قازاقتەلەكوم» اق-نىڭ بۇقارامەن بايلانىس جونىندەگى قىزمەتىنىڭ جەتەكشىسى يۋليا يساكوۆاعا تەندەر وتكىزۋ كەزىندە كەز-كەلگەن ادىسپەن «ۇلتتىق باسپا ءسوز كلۋبىنىڭ» جەڭىسىن قامتاماسىز ەتۋگە كومەكتەسۋدى تاپسىرادى. 2011 جىلدىڭ كوكتەمىندە «قازاقتەلەكوم» اق-ى جارنامالىق-اقپاراتتىق ماتەريالداردى ورنالاستىرۋ بويىنشا قىزمەت تۇرلەرىن ساتىپ الۋعا تەندەر وتكىزەدى. الايدا تەندەر وتكىزىلمەگەن بولىپ ەسەپتەلەدى. سودان كەيىن كومپانيا «ءبىر كوزدەن» قارجىلاندىرۋ ءۇشىن «ۇلتتىق باسپا ءسوز كلۋبى» قوعامدىق بىرلەستىگىمەن كەلىسىم-شارت جاساۋعا شەشىم قابىلدايدى. كەلىسىم-شارتتاردى ازىرلەۋ كەزىندە (سونىڭ ىشىندە قىزمەت تۇرلەرىنىڭ قۇنى دا بار) ول يۋ. يساكوۆاعا باسپا باق-تاردىڭ پرايس-پاراقشاسىندا بەكىتىلگەن باعانى ەمەس، «ۇلتتىق باسپا ءسوز كلۋبى» ءقب-نىڭ كونكۋرستىق ءوتىنىمىنىڭ باعاسىن ەنگىزۋدى تاپسىرادى. يۋ. يساكوۆا ءوز كەزەگىندە كەلىسىم-شارتتى سولاي دايىنداۋعا مەنەدجەرلەرگە تاپسىرما بەرەدى.

ستراتەگيالىق باسقارۋ جونىندەگى باس ديرەكتوردىڭ پارمەنىمەن، يۋ. يساكوۆانىڭ جەتەكشىلىگىمەن مەنەدجەرلەر «ۇلتتىق باسپا ءسوز كلۋبىنا» جان-جاقتى «جاردەم» بەرەدى. ماسەلەن، ولار «ۇلتتىق باسپا ءسوز كلۋبى» كونكۋرستىق ءوتىنىمىن رەسمي تۇردە تاپسىرعانعا دەيىن، الدىن-الا قاراپ، كەمشىلىگى بولعان جاعدايدا ونى قالاي تۇزەتۋ جولدارىن نۇسقاپ وتىرعان. ال ب. ماحانبەتاجييەۆ اتقارىلعان جۇمىستاردى تەكسەرمەي، «ۇلتتىق باسپا ءسوز كلۋبى» ءقب-نىڭ اكتىلەرى مەن ەسەپ-قيساپ قۇجاتتارىنا ءىس جۇزىندە ەشقانداي تەكسەرىس جۇرگىزبەي، قول قويا بەرگەن. ءوزىنىڭ ايتۋىنشا، جۋرناليستەردىڭ اراسىندا اسا تانىمال جانە ىقپالدى ادام بولعاندىقتان س. ماتايەۆتىڭ ادالدىعىنا سەنگەن. ايتارلىعى، «قازاقتەلەكوم» اق-ى مەن «ۇلتتىق باسپا ءسوز كلۋبىنىڭ» اراسىندا جوعارىداعىداي كەلىسىم-شارتتاردى جاساۋ 2012 جانە 2013 جىلدارى دا جۇزەگە اسىرىلعان. وندا دا تەندەرلىك راسىمدەر «جاساندى» جولمەن وتكىزىلىپ، سوڭىنان «ۇلتتىق باسپا ءسوز كلۋبىنا» «ءبىر كوزدەن» قاراجات اۋدارىلىپ وتىرعان. ب. ماحانبەتاجييەۆ پەن يۋ. يساكوۆالار اتقارىلعان جۇمىستاردىڭ شىنايىلىعىن تەكسەرمەي، اكتىلەر مەن ەسەپ-قيساپ قۇجاتتارىنا قول قويعان. سودان كەيىن قوماقتى قاراجات «ۇلتتىق باسپا ءسوز كلۋبىنىڭ» ەسەپ-شوتىنا اۋدىرىلىپ وتىرعان. ايتا كەتەلىك، سەيىتقازى جانە اسەت ماتايەۆتار «قازاقتەلەكوم» اق-نىڭ 143 ملن. تەڭگەگە جۋىق اقشاسىن ۇرلاعان.

ءامىرلان ءالىمجان