استانا قالاسىندا وتكەن «Bolashak Hockey Cup» اتتى اۋەسقويلار مەن ارداگەرلەر اراسىنداعى حوككەيدەن رەسپۋبليكالىق تۋرنير ءوز سوڭىنا جەتتى. 8 كوماندا قاتىسقان سايىستا وسكەمەن قالاسىنىڭ قۇراماسى ءبىرىنشى ورىن يەلەندى، - دەپ حابارلايدى Qamshy.kz.

ايتا كەتسەك، وسكەمەن قالاسىنىڭ قۇراماسى اتالعان سايىسقا ءبىرىنشى رەت قاتىسىپ وتىر. كوماندا ويىنشىلارىنىڭ ايتۋىنشا، كورسەتكىشتەرىنە ءتانتى بولعان ۇيىمداستىرۋشىلار تۋرنيردى ءار جىل سايىن ءداستۇرلى تۇردە وتكىزۋدى ۇسىنعان.

– وسكەمەن قالاسى قازاقستاندىق حوككەيدىڭ وتانى بولعاندىقتان، جەڭىلىس تابۋدىڭ ءوزى نامىس كورىندى. كوماندا مۇشەلەرىنە العىسىم شەكسىز، ەرەسەك بولسا دا، ەسكى حوككەي مەكتەبىنىڭ ادىستەرىن ۇمىتپاپتى. ويىن بارىسىندا اقمولالىق كوماندامەن ويىن قىزىقتى دا تارتىستى ءوتتى. ەندى ءار جىل سايىن قاتىسىپ، جەتىستىككە جەتۋگە بەل بۋىپ وتىرمىز، – دەدى قۇراما مۇشەسى ەرلان تۇراروۆ.

تۋرنير كورسەتكىشتەرى بويىنشا، ەكىنشى ورىندى الماتىلىقتار يەلەنسە، ءۇشىنشى ورىنعا اقمولا كومانداسى اياق تىرەگەن.