وزبەكستاندا بولاشاق تاق يەگەرى بولۋى مۇمكىن ەسىمدەر اتالا باستادى. ولاردىڭ اراسىندا ەلدىڭ پرەمەر-مينيسترى مەن سەنات باسشىسى جانە يسلام كارىموۆتىڭ كىشى قىزى دا بار، - دەپ حابارلايدى Qamshy.kz كتك ارناسىنا سىلتەمە جاساپ.

وزبەكتىڭ بەلگىلى ساياسي ساراپشىلارى ءقازىردىڭ وزىندە ەل تۇتقاسىن ۇستايتىن ءبىرقاتار ەسىمدەردى اتاپ قويدى.

ەڭ الدىمەن وزبەك باسشىسىنىڭ كىشى قىزى لولا كارىموۆانىڭ اتى اتالىپ وتىر. ويتكەنى، تاشكەنتتەگى وكساراي رەزيدەنسياسىندا وتكەن ءبىر جيىندا يسلام كارىموۆتىڭ ءوزى لولانى ءىزباسار ەتكىسى كەلەتىنىن مالىمدەپتى-مىس.

ودان بولەك، ساياسي سالماعى جونىنەن ۇكىمەت باسشىسى شاۆكات ميرزيايەۆتىڭ اتى وزىپ تۇر. ول 2003 جىلى پرەزيدەنت كارىموۆتىڭ ۇسىنىسىمەن پرەمەرلىككە كەلگەن بولاتىن.

الايدا زاڭ بويىنشا سەنات ءتوراعاسى نيگماتۋللا يۋلداشيەۆتىڭ دا پرەزيدەنت بولۋ مۇمكىندىگى بار. ال وتكەن سەنبى كۇنى اۋرۋحاناعا جەتكىزىلگەن پرەزيدەنت كارىموۆتىڭ حال-جاعدايى الداعى بەس كۇن ىشىندە جاريا ەتىلمەك.