تانىمال ساياساتكەر جاسارال ءقۋانىشالى بۇل تۋرالى ءوزىنىڭ فەيسبۋكتەگى پاراقشاسىندا بىلاي دەيدى:
كورشى ەل باسشىسىنىڭ سوڭعى ساپارعا اتتانۋىنا وراي الداعى ۋاقىتتا، البەتتە، ءتۇرلى پىكىرلەر ايتىلادى، جازىلادى، جاريالانادى. ءقازىردىڭ وزىندە ايتىلىپ، جازىلىپ، جاريالانىپ جاتىر. سونداي-اق، بۇل وقيعاعا مەنىڭ دە ءوز كوزقاراسىم بار، الايدا ول ادەتتە مۇنداي جاعدايعا وراي تۋىندايتىن ساياسي تالداۋ تۇرىندەگى ءقوزقاراس ەمەس، ازىرشە تەك وزبەك پرەزيدەنتىنىڭ بۇ دۇنيەدەن باز كەشۋ سەبەبىنە بايلانىستى، مەنىڭشە، وزىنەن-وزى سۇرانىپ تۇرعان كوزقاراس بولماق.
اقپارات كوزدەرىنىڭ حابارلاۋىنشا، يسلام كارىموۆ 26-تامىز كۇنى كەشكە وزبەك سپورتشىلارىنىڭ وسى ءقازىر عانا اياقتالعان ريو وليمپياداسىنان بۇرىن-سوڭدى بولماعان تابىسپەن ورالۋىنا بايلانىستى ۇلكەن توي (بانكەت) جاساپ، سول تويداعى قۋانىش ۇستىندە ءوزىنىڭ اكىمشىلىگىنىڭ جەتەكشىسى زەليمحان حايداروۆتىڭ ساقتاندىرعانىنا قۇلاق اسپاي، اراق-شاراپتى ۇرتتاڭقىراپ قويىپتى دا، تويدان كەيىن ءبىر جارىم ساعات وتكەن سوڭ سول زەليمحان اكامەن اڭگىمە ۇستىندە كەنەت ەسىنەن تانا قۇلاپ، ينسۋلتكە ۇشىراپتى...
ال، بىلەتىندەردىڭ ايتۋىنشا، كاريموۆتىڭ وزبەكستان وليمپيادالىق قۇراماسىنىڭ جەتىستىگىنە جۇرەگى جارىلا قۋاناتىنداي نەگىزى بولعان كورىنەدى. ول نەگىز – بۇل كىسىنىڭ وسى جەتىستىككە تىكەلەي ىقپال ەتكەندىگى بولسا كەرەك. ودان دا گورى ناقتىلاي ايتساق، ءتورت جىلدا ءبىر رەت وتەتىن وسىناۋ ۇلانعايىر الەمدىك جارىس الدىندا يسلام اكا حالىقارالىق اۋەسقوي بوكس اسسوسياسياسىنىڭ (ايبا) پرەزيدەنتى چينگ-كۋو ۆۋ مىرزامەن ءوز كابينەتىندە جەكە جولىعىپ، اڭگىمە-دۇكەن قۇرىپتى. سونىڭ ناتيجەسىندە، شەتەلدىك اقپارات كوزدەرى حابارلاعانداي، وليمپيادا بارىسىندا شارشى الاڭدا وزبەك بوكسشىلارىنىڭ قاتىسۋىمەن وتكەن ءبىرقاتار ايقاستاردا تورەشىلەر ولارعا «وڭ كوزىمەن» قاراپ، ءتىپتى جەڭىلىس تاپقان جاعدايلاردىڭ وزىندە وزبەكتەردىڭ قولىن كوتەردى. نە جاسىراتىنى بار، بىلعارى قولعان شەبەرلەرىنىڭ كەزدەسۋلەرىن باستان-اياق تاماشالاعان وسى جولدار اۆتورى دا مۇنى راستاي الادى.
ماسەلەن، العاشقى كەزدەسۋىنەن-اق بارشا بوكس جانكۇيەرلەرىن ءوزىنىڭ «مەيۋەزەرشە» جۇدىرىقتاسۋ شەبەرلىگىمەن ءتانتى ەتكەن ءبىزدىڭ قايرات ەرالييەۆ 56 كەلى سالماقتا بايىرعى قارسىلاسى مۋرودجون احمادالييەۆتەن ايقىن باسىم تۇسسە دە، قازىلار القاسى جەڭىستى وزبەك بوكسشىسىنا بەرىپ، كوپشىلىكتىڭ نارازىلىعىن تۋدىردى. سونداي-اق، مۇنداي قاراۋلىق 64 كەلىدە گەري راسسەل مەن فازليددين گايبنازاروۆ اراسىندا وتكەن باسەكەدە دە ورىن الىپ، اقش قۇراماسىنىڭ باس باپكەرى بيللي ۋولشتىڭ ايبا-نى «وزبەكستانعا بولىسۋدا» دەپ ايىپتاۋىنا، ال، ايقاستى ءجىتى قاداعالاپ وتىرعان فلويد مەيۋەزەردىڭ تورەشىلەر شەشىمىن «اشىقتان-اشىق توناۋشىلىق» دەپ باعالاۋىنا سەبەپكەر بولدى. جالپى العاندا، ۋولشتىڭ سول كەزدە-اق: «ۋزبەكيستان توچنو ستانەت لۋچشەي كوماندوي ۆ وبششەم زاچەتە. وني ۆىيگرىۆايۋت ۆسە. داجە كوگدا ۆى پوبەجداەتە نا رينگە، ۆام نە وتدادۋت پوبەدۋ»، – دەپ، كورەگەندىكپەن جاساعان جانە كەيىن شىندىققا اينالعان مالىمدەمەسىمەن ءوز باسىم تولىق كەلىسەمىن. ءسويتىپ، جارىستان شىعىپ قالۋعا ءتيىس بولعان اتالمىش ەكى وزبەك بوكسشىسى اقىرىندا جۇلدەلى ورىندارعا ىلىگىپ، ءبىرى قولا، ەكىنشىسى التىن مەدالعا يە بولدى دا، كەرىسىنشە، جارىستى جالعاستىرۋعا تولىق قۇقىقتى بولعان قايرات ەرالييەۆ پەن ولجاس ساتتىبايەۆ (ءازىربايجان بوكسشىسى ەلۆين ماميشزادەدەن «جەڭىلدى») تورەشىلەردىڭ كوپە-كورنەۋ ادىلەتسىزدىگى كەسىرىنەن وليمپيادانى ەرتە اياقتاپ، جۇلدەسىز قالدى. ايتپەگەندە، جارتىلاي فينالعا قازاقستاننان ءتورت ەمەس، كەم دەگەندە التى بوكسشى، وزبەكستاننان جەتى ەمەس، اسىپ كەتكەندە بەس بوكسشى شىعاتىن ەدى.
ءسويتىپ، ءبىزدىڭ ەلدەرىمىز ريوعا دەيىن تاۋەلسىز مەملەكەتتەر رەتىندە قاتىسقان بەس وليمپيادادا قازاقستاننان التى بوكسشى چەمپيون اتانىپ، وزبەكستاننان مۇنداي اتاققا تەك ءبىر بوكسشى عانا قول جەتكىزسە، بۇل جولى بىزدەن تەك دانيار ەلەۋسىزوۆ قانا «قازاق سالماعى» – 69 كەلىدە وزبەك بوكسشىسى شاحرام گياسوۆتى ەش كۇمانسىز جەڭىپ، توپ جاردى دا، ءۇش بىردەي (!) بوكسشىسى چەمپيون اتانعان وزبەكتەر ايدى اسپاننان ءبىر-اق شىعاردى! مۇنداي "عاجايىپ" جاعدايدىڭ توقەتەرى بەلگىلى: تورەشىلەر «جاسىل جارىق» جاعىپ قويعان بوكسىشىلارىنىڭ «ارقاسىندا» ءتورت التىن مەدال العان (ءتورتىنشىسى – اۋىر اتلەتتەر ۇلەسىندە) وزبەكستان قۇراماسى ريوداعى ويىنداردىڭ سوڭعى كۇنى تەك بوكسشىلار جارىسىندا عانا ەمەس، جالپى ەسەپتە دە وليمپيادالار تاريحىندا العاش رەت قازاقستاننىڭ الدىن وراپ كەتتى!
ارينە، ءبارى ادال بولعان جاعدايدا، ءسوز جوق، ءبىز قوڭسىلاس ەلدىڭ جەتىستىگىنە وزبەكتەرمەن بىرگە قۋانار ەدىك. الايدا، ولاي بولماعان سوڭ، شىندىقتى ايتپاسقا دا امال جوق. جانە دە، كىم بىلەدى، مۇمكىن، وزبەكستان باسشىسىنىڭ كەنەت قازاعا ۇشىراۋىنا جوعارىدا ايتىلعان جاعدايلار دا سەبەپ بولعان شىعار؟..
دەي تۇرعانمەن، ارينە، يسلام كاريموۆ قازاسىنىڭ ارتى قايىرلى بولعاي دەپ تىلەيمىز! وزبەكستان ءۇشىن، باۋىرلاس وزبەك حالقى ءۇشىن...
ءسوز سوڭىندا ەسكەرتە كەتەيىن: وليمپيادادا ورىن العان كەلەڭسىز جاعدايلاردى كولەمدىرەك قامتۋ نيەتىمەن بۇل ماقالانى مەن، كوڭىلىمدە ەش سەكەم جوق، وسىدان بىرنەشە كۇن بۇرىن جازا باستاعانمىن. الايدا، وزبەك پرەزيدەنتىنىڭ الدىمەن ينسۋلت الۋى، ودان سوڭ قايتىس بولۋى جونىندە وقىس حابار تاراۋىنا بايلانىستى ول جۇمىستى كىدىرتە تۇرىپ، اقىر سوڭىندا ماقالانى بۇگىن قىسقارتىپ جانە وسىلايشا وزگەرتىپ جازۋعا تۋرا كەلدى...
