تۇركيانىڭ جەرگىلىكتى باسىلىمى سانالاتىن «Sozcu» گازەتىنىڭ ءجۋرناليسى جان اتاكلى  ءپۋتيننىڭ ەردوعانعا قويعان 7 شارتى جايلى جازادى.

«كەيبىر كەزدەردە كۇتپەگەن جەردە كۇتپەگەن ادامدارمەن كەزدەسىپ قالاسىڭ. جۋىردا جاقىن دوسىمنىڭ ۇيىندە بولدىم، ورىس تانىسى دا قوناققا كەلىپتى. الايدا، بۇل ءجاي ادام بولماي شىقتى. كرەملگە وڭاي كىرىپ جۇرگەن ءپۋتيننىڭ اناليتيكتەرىنىڭ ءبىرى ەكەن. اڭگىمەلەسىپ وتىرىپ ەردوعاننىڭ رەسەيگە ساپارى تۋرالى، پۋتينمەن اڭگىمەسىنىڭ ءبىز بىلمەيتىن تۇستارىن ايتىپ بەردى. ونىڭ ايتۋىنشا، پۋتين وسى كەزدەسۋدە ەردوعانعا 7 شارت قويعان. «شارت» دەپ ايتۋىم ءبىراز قاتتى ەستىلۋى مۇمكىن، قالاساڭىز 7 «ۇسىنىس» دەپ قابىلداي الاسىز»،-دەيدى جان اتاكلى.

سونىمەن ەردوعانعا قويىلعان ول جەتى تالاپ قانداي تالاپتار بولدى ەكەن؟

1) سيرياعا قاتىستى جۇرگىزگەن ساياسات باسىنان قاتە بولدى:

ناتيجەنى اسادتىڭ كەتۋىمەن جوسپارلادىڭىز، الايدا بۇنىڭ قاتە ەكەنى بەلگىلى بولدى. ءبىز اسادتى قولدايمىز، ءسىز دە ەندىگى جەردە قىرسىعۋدى قويىپ اسادتى مويىنداڭىز. سەبەبى سيريا ماسەلەسىنىڭ شەشىمى اسادپەن تىكەلەي بايلانىستى.

2) قاراباق ماسەلەسىندە سابىرلى بولىڭدار:

قاراباق ءبىز ءۇشىن ماڭىزدى. ءسىز ءۇشىن دە ءازىربايجانعا بايلانىستى ماڭىزدى ەكەنىن بىلەمىز، ءبىراق سابىرلى بولىڭىزدار. بۇل ماسەلەنى دە شەشۋ كەرەك. بىزگە قىرسىعۋ ارقىلى بۇل ماسەلەنى ودان سايىن قيىنداتىپ جىبەردىڭىزدەر.

3) قىرىم مەن كاۆكازدان الىس جۇرىڭدەر:

قىرىممەن تاريحي بايلانىستارىڭدى قولدانىپ، ولاردىڭ بىزگە قارسى ارەكەتتەرىن قولداپ وتىرسىڭدار. كەيبىر كاۆكاز ەلدەرىندە دە وسىلاي جاسايسىڭدار. بۇل ارەكەتتەرىڭدى دە مۇقيات باقىلاپ ءجۇرمىز. قاتەلەسىپ جۇرسىڭدەر. بۇلار  بايلانىسىمىزدىڭ جاقسارۋىنا ەمەس، جاڭا پروبلەمالاردىڭ اشىلۋىنا سەبەپ بولادى.

4) ءتورت ەلدەن قولدارىڭدى تارتىڭدار:

قىرعىزستان، تۇركمەنستان، قازاقستان، وزبەكستان فەدەراسيامىزدىڭ مۇشەلەرى. سەندەردىڭ قۇپيا اگەنتتەرىڭ بۇل ەلدەردە جۇمىس جاساپ جاتقاندارىن، بىزگە قارسى ۇگىتتەپ جۇرگەندەرىن دە بىلەمىز، باقىلاپ ءجۇرمىز. بۇلارىڭدى قويىڭدار. سەندەردى بۇلاي تايراڭداتىپ قويىپ، قاراپ وتىرمايمىز.

5) دبپ (دەموكراتتىق بىرلىك پارتياسى) ءبىز ءۇشىن دە ماڭىزدى:

سيريادا يشيم جانە سوعان ۇقساس ءقاۋىپتى ۇيىمدار بار كەزدە، سەندەر نازارلارىڭدى دبپ-عا (PYD – كۇرد پارتياسى) اۋداراسىڭدار. ولاردىڭ بىزگە دە ماڭىزدى ەكەنىن بىلىڭدەر. ءار قادامدارىڭدى ويلانىپ باسىڭدار. ايتپەسە، ەش ويلاماعان جاعدايلار ورىن الادى.

6) شەكارالارىڭدى تەررورعا قارسى جابىڭدار:

ەندى سيرياعا قارۋ-جاراقتاردى جىبەرۋدى توقتاتىڭدار. شەكارالارىڭ تەررورلىق ۇيىمدار مەن رەسەيگە قارسى ارەكەت جاسايتىندارعا ايقارا اشىق بولىپ تۇر. شەكارالارىڭا مۇقيات بولىڭدار، تەررورلىق ۇيىمدارعا قولداۋ كورسەتپەڭدەر.

7) باسشىلارىڭ سوزدەرىنە يە بولسىن:

ەكى ەل اراسىنداعى بايلانىستا سەنىم مەن اشىقتىق وتە ماڭىزدى. كەيبىر باسشىلاردىڭ مالىمدەمەلەرى ءبىزدى قاتتى اشۋلاندىردى. ۇشاعىمىزدىڭ قۇلاتىلۋىنان كەيىنگى مالىمدەمە جاساعان كەيبىر باسشىلاردىڭ سوزدەرى ءالى دە ۇمىتىلمادى. بۇدان كەيىن اسا ۇقىپتى بولىڭدار.

«پۋتين كومەكشىسىنىڭ مالىمدەمەسىن تىڭدادىم. اشىق ايتايىن، قىرىم، كاۆكاز، ءتورت تۇركى ەلدەرى تۋرالى وسىنشاما دەتالدى باياندامانى بۇعان دەيىن ەستىمەگەنمىن. وسى ورىس اناليتيكتىڭ تاعى پۋتين-ەردوعان كەزدەسۋى تۋرالى ءوز ويلارى مەن بولجامدارىن ايتتى. ولاردى كەلەسى جازبامدا وقيسىزدار» دەپ اياقتايدى ويىن.