بۇگىن پارلامەنت پالاتالارىنىڭ بىرلەسكەن سەسسياسىندا ەلباسى نۇرسۇلتان نازاربايەۆ وسىلاي دەپ مالىمدەدى.
«وتكەن جازداعى وقيعالار الەمدەگى ەشبىر ەلدىڭ لاڭكەستىك ارەكەتتەردەن قورعالماعانىن كورسەتتى. لاڭكەستىك قاتەر قازاقستانعا دا كەلدى. (...) ەلدىڭ ءبارى ءبىز تاۋەلسىزدىكتىڭ ەكىنشى جيىرما بەس جىلدىعىن قيىن جاعدايمەن باستاعانىمىزدى ايتىپ ءجۇر»، - دەگەن ول اقتوبە، الماتى قالالارىندا بولعان تەراكتىلەرگە دە توقتالدى.
«قازاقستان الەمنىڭ باسقا دا ەلدەرى سياقتى لاڭكەستىك قاتەرمەن بەتپە-بەت كەلىپ وتىر. اقتوبە، الماتى قالالارىنداعى تەراكتىلەر كەزىندە ۇلتتىق ۇلان جاۋىنگەرلەرى، پوليسەيلەر، ەش كىناسى جوق ازاماتتار قازا تاپتى»، - دەدى ن. نازاربايەۆ.
پرەزيدەنت مۇنداي قاۋىپ-قاتەرگە قاتاڭ زاڭمەن عانا قارسى تۇرۋعا بولاتىنىن باسا ايتتى.
«بىزگە مۇنداي شارۋالارعا قارسى تۇرۋ ءۇشىن باتىل زاڭنامالىق شارالارعا بارۋ كەرەك. مەنىڭ تاپسىرماممەن ەكسترەميزم، تەرروريزم، قارسى بارلاۋ قىزمەتى، داكتيلوسكوپيالىق جانە گەندىك تىركە، پروباسيا، ەلدىڭ اقپاراتتىق قاۋىپسىزدىگىن قامتاماسىز ەتۋ ماسەلەلەرى بويىنشا جەتى زاڭ جوباسى ازىرلەنىپ، ماجىلىسكە ۇسىنىلادى. ءقازىر ەڭ باستىسى – قوعامداعى قاۋىپسىزدىك پەن تۇراقتىلىقتى ساقتاۋ»، - دەدى ەلباسى.
پارلامەنت جۇمىسىنىڭ ەكىنشى سەسسياسى ەل تاۋەلسىزدىگىنىڭ 25 جىلدىعىنا تۇسپا-تۇس كەلىپ وتىرعانىنا نازار اۋدارتقان پرەزيدەنت جاڭا سەسسيادا 50-گە جۋىق زاڭ جوباسى تالقىلانىپ، قابىلداناتىنىن ايتتى.
«بۇل تەك توي تويلاۋ ەمەس. ءبىز ءاربىر اۋىل، قالا، وبلىس، وڭىرلەردەگى حالىققا شيرەك عاسىر ىشىندە جەتكەن جەتىستىكتەرىمىزدى كورسەتۋىمىز كەرەك. وسى كەزەڭگە بەلگىلەنگەن ءىس-شارالار قازىردەن باستالۋى ءتيىس»، - دەدى ەلباسى.
سونداي-اق، پرەزيدەنت ۇلت جوسپارىن جۇزەگە اسىرۋ، حالىقتىڭ ءال-اۋقاتىن ارتتىرۋ مەن زاڭ ساپاسىن جەتىلدىرۋ، جاڭا زاڭداردى حالىققا ءتۇسىندىرۋ جايىنا دا توقتالدى.
