گرۋزيادا «بوگەلىپ» قالعان بارلىق 324 تۋريست قازاقستانعا ورالدى. بۇل تۋرالى ينۆەستيسيالار جانە دامۋ ءمينيسترىنىڭ كەڭەسشىسى تاڭىربەرگەن بەردوڭعاروۆ ءمالىم ەتتى، - دەپ حابارلايدى Qamshy.kz قازاقپاراتقا سىلتەمە جاساپ.

«بۇگىن تاڭعى ساعات 3:45-تە باتۋميدە «بوگەلگەن» قازاقستاندىق تۋريستەرى بار ۇشاق رەيسى  استانا اۋەجايىنا كەلىپ قوندى. ەسكە سالايىق، گرۋزيادا Skybus كومپانياسىنىڭ رەيستەرى توقتاتىلۋىنا بايلانىستى قازاقستاندىق تۋريستەر قالىپ قويعان بولاتىن»، - دەپ جازدى مينيستر كەڭەسشىسى فەيسبۋكتەگى پاراقشاسىندا.

ونىڭ ايتۋىنشا، پروبلەما تىكەلەي ءمينيستردىڭ ارالاسۋىمەن جانە BekAir كومپانياسىنىڭ تۇسىنىستىگى ارقاسىندا وڭ شەشىمىن تاۋپ وتىر.

«بارلىعى ەكى تاۋلىك ىشىندە 324 ادام شۇعىل تارتىپپەن ەلگە جەتكىزىلدى. دەگەنمەن، الداعى ۋاقىتتا وسىنداي وقيعالار قايتالانباس ءۇشىن شەتەلدەگى تۋريستەردى قورعاۋ جوننىدەگى جۇيەنى جۇزەگە اسىرۋ كەرەك. ولاردىڭ تۇراتىن ورنىن، تاماعى مەن كەرى قايتۋ ماسەلەلەرى دۇرىس شەشىلۋى ءتيىس. تۋروپەراتورلار قاۋىمداستىعىنا ءوتىنىش، باستالعان جۇمىستى جەدەلدەتىپ، قاتىسۋ ساتىسىنا بايلانىستى كونسەنسۋس تابۋ كەرەك»، - دەپ جازدى ت.بەردوڭعاروۆ.

ەسكە سالا كەتسەك، 26 تامىزدا 300-دەن استام قازاقستاندىق تۋريست باتۋميدەن ەلگە قايتا الماي قالعان بولاتىن.