اتىراۋ وبلىسىندا نودۋليارلىق دەرماتيتكە ۇشىراعان مال سانى كوبەيىپ جاتىر. بۇل دەرتكە ءقازىر ايماقتا 6000-عا جۋىق ءىرى قارا شالدىعىپ، 700-دەن استامى ارام قاتىپتى. اۋرۋ مال، اسىرەسە، قۇرمانعازى جانە يساتاي اۋداندارىندا كوپ، - دەپ حابارلايدى Qamshy.kz كتك ارناسىنا سىلتەمە جاساپ.

بيىل ەلىمىزدە العاش رەت تىركەلگەن بۇل اۋرۋعا قارسى ەم جاسالعانىمەن، كوڭىل كونشىتەرلىك ناتيجە جوق. ىندەت ەلىمىزگە رەسەيدىڭ استراحان وبلىسىنان كەلۋى مۇمكىن. ءقازىر تۇرعىندارعا سيىر اتاۋلىنى سويىپ، ەتىن جەۋگە، ءسۇتىن ىشۋگە تيىم سالىنعان. ءبىر اي بۇرىن وبلىس بويىنشا كارانتين جاريالانىپ، رەسپۋبليكالىق ماڭىزى بار، سونداي-اق قالا ىشىندەگى جولدارعا دەزينفەكسيالىق پۋنكتتەر قويىلعان ەدى. شارا ەڭ سوڭعى اۋرۋ مال جازىلعاننان كەيىن 30 كۇن وتكەنشە جالعاسپاق. ال وسىعان دەيىن اۋرۋدىڭ الدىن الۋ ماقساتىندا ارنايى پرەپاراتتار بۇركىپ كەلگەن ۆەتەرينارلار ەندى باسقا امالعا كوشىپتى. ياعني، الداعى ۋاقىتتا ءىرى قاراعا ماسا، شىبىن، سونانى جاقىنداتپاس ءۇشىن سيىرلاردى سىرعالاماق. 

-بۇل سىرعانىڭ دا سەكرومەترين 935 مگ-دىق ءدارى بار سەكرومەترين دەگەن. بۇل انا تەرىنىڭ مايلى بەزدەرىمەن بايلانىسقا ءتۇسىپ، دەنەگە تارايدى دا، ماسا دا، شىبىن دا قوندىرمايدى. بۇل ەندى ءقازىر ءبىزدىڭ كورىپ وتىرعان  ەڭ ءبىرىنشى وسىعان قولداناتىن ەمىمىز وسى، - دەيدى اتىراۋ وبلىستىق ۆەتەريناريا باسقارماسىنىڭ باسشىسى نۇرباي ءابدىراحمانوۆ.