شەتەلدەن كەلگەن قازاقتار قىتايعا كەرى قايتقانشا، قازاقستاندا سوتتالىپ كەتكەندى نەمەسە "بوسقىن" دەگەن رەسمي اتاق العاندى ءجون كورەدى. ويتكەنى ولاردى ۆيزالىق رەجيمدى بۇزعانى ءۇشىن قاماۋعا الىپ، ارتىنشا ەلدەن قۋىپ جاتىر ەكەن. ءتىپتى كەيبىرىنىڭ 5 جىل اتاجۇرتقا كىرۋىنە تىيىم سالىنىپتى، - دەپ حابارلايدى Qamshy.kz 31-ارناعا سىلتەمە جاساپ.

قىتايدان مەكتەپ ءبىتىرىپ، قازاقستاننان جوعارى ءبىلىم الامىن دەپ كەلگەن باۋىرجان بۇگىندە ۋنيۆەرسيتەتتە ەمەس، باسىن اراشالاپ قالۋ ءۇشىن قۇجات جيناپ ءجۇر. بىلتىر ۆيزامەن كىرىپ، ورالمان كۋالىگىن يەمدەنگەن ول ىقتيار حات الامىن دەپ جۇرگەندە بالەلى بولعان. الماتى وبلىسىنىڭ كوشى-قون پوليسياسىنداعىلار "ۆيزاڭنىڭ مەرزىمى ءوتىپ كەتكەن" دەپ، ءىسىن سوتقا جونەلتىپتى.

باۋىرجان مادەن، ورالمان:

- سوت بىلاي شەشىم شىعاردى عوي: "سەن قىتايعا كەتەسىڭ 5 جىلعا. 15 كۇنگە قامالاسىڭ. سەن 1 جىلدىڭ ىشىندە قازاقستاننىڭ زاڭىن 2 رەت بۇزدىڭ" دەدى. سودان ەندى كەتەتىندەي ەمەس. قالاي كەتەم؟ قىتايدا تۋىسقانىم جوق. ءبارى وسى جاققا كوشىپ كەلىپ العانبىز.

باۋىرجاننىڭ ءوزى زاڭدى بۇزعانىن مويىنداپ وتىر. ءبىراق، ەلگە جولاتپاي قۋالايتىنداي اۋىر قىلمىس جاساماعانىن ايتىپ، جەڭىلدىك سۇرايدى. بۇل - ءبىر عانا باۋىرجاننىڭ ماسەلەسى ەمەس. قانشاما ورالماننىڭ تۇيتكىلىن تىڭداپ جۇرگەن اۋىت مۇقيبەك، وسىنداي جازاعا ىلىككەن جۇزدەگەن قانداسىمىز اتاجۇرتقا كەلەتىن كۇندى اڭساپ، كۇن ساناپ جۇرگەنىن ايتادى.

اۋىت مۇقيبەك، اقىن:

- مەنىڭ ويىم بۇنى دەپۋتاتتار ارقىلى قانشا ادام وسى تارتىپتىك جازاعا تارتىلعانىن انىقتاۋ كەرەك. سوسىن ەندى بيىل 25 جىلدىق توي عوي. ءبولىنىپ قالعان وتباسىلاردى قوسۋ ءۇشىن راقىمشىلىق جاساۋ كەرەك سياقتى. ونى ۇسىنىس ەتۋ كەرەك. باس پروكۋراتۋرا مەن جوعارعى سوتقا حات جازىپ، 1 جولعا راقىمشىلىق جاساسا ءبولىنىپ كەتكەن اعايىندار بىر-بىرىنە قوسىلادى دەپ ويلايمىن.

بۇل جاعداي تۋرالى دەپۋتاتتاردىڭ دا پىكىرىن بىلدىك. ماجىلىسمەندەر بىلتىر قابىلدانعان زاڭدا ءبارى قاراستىرىلعان، تەك سونى بۇزباۋ كەرەك ەدى دەيدى.

قۋانىش سۇلتانوۆ، ق ر پارلامەنتى ءماجىلىسىنىڭ دەپۋتاتى:

- ءقازىر ورالمانداردىڭ جاعدايلارى جەڭىلدەنگەن. ولاردىڭ ازاماتتىق الۋى دا جەڭىلدەندى. بىلتىر ءبىز زاڭ قابىلدادىق. سول زاڭدا كوپ وزگەرىستەر ەنگىزدىك.

باقىتبەك سماعۇل، ق ر پارلامەنتى ءماجىلىسىنىڭ دەپۋتاتى:

-  زاڭنىڭ ءبىر نەمقۇرايلى جەرلەرى بولسا، جەرگىلىكتى ورگاندارمەن، حات جۇزىندە بەرىپ جاتسا ءبىز قولدان كەلگەنشە قاراستىرايىق.

ال قۇزىرەتتى ورگانداردى ارالاپ، جەڭىلدىك سۇراعان باۋىرجان قازاقستاننان شىعارىلۋ تۋرالى شەشىمدى ورىنداماعانى ءۇشىن تاعى دا جازاعا تارتىلۋى مۇمكىن ەكەنىن بىلەدى. ءبىراق، باسقا امالى جوق.

باۋىرجان مادەن، ورالمان:

-  قامالعانىم دۇرىس قوي. قىتايعا بارىپ، تەنتىرەپ 5 جىل ءجۇرىپ شىعىپ-كىرە الماي جۇرگەننەن وسى قازاقستاندا جاتا بەرەيىن دە قاي جەردە بولسا دا. قاماسا دا مەيلى ەندى، نە ىستەيمىن؟ + تىم بولماعاندا "بوسقىن" مارتەبەسىن بەرسە دە قازاقستاندا قالسام دەگەن ۇمىتتەمىن.

قازىرگى تاڭدا ءدال وسىلاي زاڭ اياسىندا ەلدەن قۋىلىپ جاتقانداردىڭ ناقتى سانى قانشا ەكەنى بىلمەك بولىپ وكىلەتتى ورگاندارعا سۇراۋ سالدىق. بۇل ماسەلەنىڭ شەشىمىن تاپپاق بولعان ساۋالىمىزعا كوشى-قون پوليسياسى جۋىق ارادا جاۋاپ بەرەمىز دەپ وتىر.

قىتايدان ەلگە ورالعان تاعى ءبىر قانداسىمىز ماحسۇتقان تۇرسىنباقتىڭ دا شەكارادان ءوتۋ ءتارتىبىن بۇزدى دەگەن ايىپپەن ەلدەن شىعارىلعانى تۋرالى جاريالاعان بولاتىنبىز.