ەلباسى نۇرسۇلتان نازاربايەۆ وزبەكستان رەسپۋبليكاسىنىڭ پرەزيدەنتى يسلام كارىموۆتىڭ قايتىس بولۋىنا بايلانىستى وزبەكستان رەسپۋبليكاسى وليي ءماجىلىسى سەناتىنىڭ ءتوراعاسى نيگماتيللا يۋلداشيەۆكە كوڭىل ايتۋ جەدەلحاتىن جولدادى، - دەپ حابارلايدى Qamshy.kz پرەزيدەنتتىڭ باسپا ءسوز قىزمەتىنە سىلتەمە جاساپ.
مەملەكەت باسشىسى وزبەكستان رەسپۋبليكاسىنىڭ پرەزيدەنتى يسلام ابدۋعاني ۇلى كارىموۆتىڭ دۇنيەدەن وتكەنى تۋرالى حاباردى زور كۇيزەلىسپەن قابىلداعانىن ايتقان.
«قازاقستاندىقتار بۇل مەزگىلسىز ءارى ورنى تولماس قازانىڭ اۋىرتپالىعىن باۋىرلاس وزبەكستان حالقىمەن بىرگە بولىسەدى. 30 جىلداي قاناتتاسا جۇمىس ىستەگەن دوسىمنان ايرىلعانىما قايعىرامىن»، – دەلىنگەن كوڭىل ايتۋ جەدەلحاتىندا.
سونداي-اق، نۇرسۇلتان نازاربايەۆ ەلدىڭ ەكونوميكالىق الەۋەتىنىڭ دامۋىنا، ونىڭ حالىقارالىق بەدەلىنىڭ وسۋىنە، قوعامنىڭ ءال-اۋقاتىنىڭ ارتۋىنا ىقپال ەتكەن اۋقىمدى وزگەرىستەردىڭ جۇزەگە اسىرىلۋى وزبەكستان رەسپۋبليكاسى تاۋەلسىزدىگىنىڭ باستاۋىندا تۇرعان يسلام كارىموۆتىڭ ەسىمىمەن بايلانىستى ەكەنىن اتاپ ءوتتى.
«ول ءوزىنىڭ بۇكىل ءومىرىن تۋعان حالقىنا قالتقىسىز قىزمەت ەتۋگە ارنادى، ءاردايىم قازاقستاننىڭ سەنىمدى دوسى بولدى جانە ءبىزدىڭ حالىقتارىمىزدىڭ اراسىندا دوستىق پەن تاتۋ كورشىلىكتىڭ نىعايا تۇسۋىنە ۇلكەن ۇلەس قوستى»، – دەلىنگەن جەدەلحاتتا.
سوڭىندا قازاقستان پرەزيدەنتى يسلام ابدۋعاني ۇلى كارىموۆتىڭ تۋىستارى مەن جاقىندارىنا جانە ەلدىڭ باسشىلىعى مەن باۋىرلاس وزبەكستان حالقىنا قاتتى قايعىرىپ كوڭىل ايتتى.
