يسلام كارىموۆتى ەمدەۋگە رەسەي، گەرمانيا جانە فينليانديا ەلدەرىنىڭ بىلىكتى ماماندارى اتسالىستى. وزبەكستان رەسپۋبليكاسىنىڭ ۇكىمەت پورتالىندا حابارلاندى پرەزيدەنتىڭ سىرقاتى مەن قايتىس بولۋى سەبەبى جايلى مەديسينالىق قورىتىندى جاريالاندى، - دەپ حابارلايدى Qamshy.kz قازاقپاراتقا سىلتەمە جاساپ.

«ي.ا. كاريموۆ 27 تامىز كۇنى تاڭەرتەڭگى 09.00 شاماسىندا ەس-تۇسسىز كۇيىندە وزبەكستان رەسپۋبليكاسى دەنساۋلىق ساقتاۋ مينيسترلىگى دارىگەرلىك-سانيتارلىق بىرلەستىگىنىڭ ورتالىق كلينيكالىق اۋرۋحاناسىنا جەتكىزىلدى. جۇرگىزىلگەن زەرتتەۋلەر، سونىڭ ىشىندە ميعا جاسالعان كت ناۋقاستىڭ مي قان اينالىمى تورلى قابىق استىنا قان قۇيىلۋ (ينسۋلت) سالدارىنان بۇزىلعانىن انىقتادى. قان قىسىمى سىناپ باعاناسى بويىنشا 250/120 بولدى. جۇرەك سوعىسى توقتاپ قالدى. 20 مينۋت ىشىندە جاسالعان رەانيماسيالىق شارالار جۇرەك سوعىسىن قالپىنا كەلتىرۋگە مۇمكىندىك بەردى. وسىدان كەيىن ناۋقاستا اتونيالىق ەستەن تانۋ بولىپ، مي باعانىنىڭ قىزمەتىنە قىسىم ءتۇسىرۋ تىركەلدى. سول سەبەپتى ول جاساندى جولمەن تىنىس بەرۋ قۇرىلعىسىنا اۋىستىرىلدى»، - دەلىنگەن حابارلامادا.

تامىزدىڭ 27-ىنەن 28-ىنە قاراعان ءتۇنى ناۋقاس شەت ەلدەردىڭ بىلىكتى  نەيروحيرۋرگ، كارديولوگ جانە رەانيماتولوگتارىمەن كونسۋلتاسيالاندى. ولار: اكادەميك ل.ا.بوكەريا - ا.ن.باكۋليەۆ اتىنداعى جۇرەك-قان تامىرى حيرۋرگياسى عىلىمي ورتالىعىنىڭ ديرەكتورى (رەسەي)؛ اكادەميك ا.ا.پوتاپوۆ - ن.ن.بۋردەنكو اتىنداعى نەيروحيرۋرگيا عىلىمي ورتالىعىنىڭ ديرەكتورى (رەسەي)؛ پروفەسسور امير سامي (ا.Samii) - گاننوۆەر ينتەرناسيونالدىق نەيروحيرۋرگيا ينستيتۋتىنىڭ ۆيسە-پرەزيدەنتى جانە اتقارۋشى ديرەكتورى (گەرمانيا)، پروفەسسور دجيللي درەيفۋس (G.Dreyvus) - كارديوتوراكالدىق ورتالىقتىڭ ديرەكتورى (موناكو)، پروفەسسور حيۋگو كاتۋس (H.Katus) - حەيدەلبەرگتىڭ ۋنيۆەرسيتەت جانىنداعى كلينيكانىڭ كارديولوگيا ءبولىمىنىڭ باسشىسى (گەرمانيا)، پروفەسسور يۋكا حەرنيسنيەمي (Y.Hernesniemi) - حەلسينكي ۋنيۆەرسيتەتىنىڭ ورتالىق اۋرۋحاناسىنىڭ نەيروحيرۋگيا ءبولىمىنىڭ پروفەسسورى (فينليانديا).

2016 جىلدىڭ 2 قىركۇيەگى كۇنى جاسالعان شارالارعا قاراماستان 20:15-تە جۇرەك قىزمەتى توقتادى. قارقىندى رەانيماسيالىق شارالار ناتيجە بەرمەدى جانە 20:55-تە ناۋقاستىڭ بيولوگيالىق ءولىمى تىركەلدى».

ەسكە سالا كەتەيىك، يسلام كارىموۆتىڭ جانازاسى 3 قىركۇيەك كۇنى سامارقاندا شىعارىلادى.