وزبەكستان استاناسىنىڭ بىرنەشە مىڭ تۇرعىنى يسلام كاريموۆتىڭ دەنەسىن اۋەجايعا الىپ وتەتىن قالانىڭ ورتالىق كوشەلەرىنىڭ بويىنا شىقتى، - دەپ حابارلايدى رەسەيلىك ربك اگەنتتىگىنە سىلتەمە جاساپ قازاقپارات.  

 ەسكە سالا كەتسەك،  ەل بيلىگى وزبەكستان باسشىسىنىڭ قايتىس بولعانىن رەسمي 2 قىركۇيەكتە حابارلاعان ەدى. يسلام كاريموۆتى 3 قىركۇيەكتە سامارقاند قالاسىنا جەرلەيدى. بۇگىن تاڭەرتەڭ تاشكەنتتىڭ ورتالىق كوشەلەرىنىڭ ەكى جاعىنا قولدارىنا گۇل ۇستاعان قالا تۇرعىندارى ءتىزىلدى. قوزعالىس بولىگىنە جاقىن تۇسقا ەكى قاتار پوليسيا قىزمەتكەرلەرى قويىلعان. كورشى كوشەلەردە كولىك قوزعالىسى توقتاتىلعان. سونداي-اق، قالادا پويىزداردىڭ ءجۇرۋ كەستەسى دە وزگەرتىلگەن.

جەرگىلىكتى تۇرعىندار كوشباسشىمەن قوشتاسۋ ءۇشىن تاڭعى 4.00-دەن باستاپ جينالا باستاپتى. 

تاشكەنت تۇرعىندارى قوشتاسۋ راسىمىنەن سۋرەتتەر مەن ۆيدەولار جاريالاپ، #مويپرەزيدەنت #withKarimov حەشتەگتەرىن قولدانىپ جاتىر.  ال وسىعان دەيىن وزبەكستان پرەزيدەنتىنىڭ كىشى قىزى لولا كاريموۆا  Instagram جەلىسىندە اكەسىنىڭ قايتىس بولعانىن مالىمدەدى. "ول ءبىزدى تاستاپ كەتتى... ءسوز تاڭداپ وتىرىپ، ءوزىم سەنە الار ەمەسپىن"، - دەپ جازدى ول الەۋمەتتىك جەلىدەگى رەسمي اككاۋنتىندا. 

   ەسكە سالايىق، وزبەكستان پرەزيدەنتى يسلام كاريموۆ 78 جاسىندا قايتىس بولدى.  يسلام كارىموۆتى جەرلەۋ ءراسىمى سامارقاندا 3 قىركۇيەكتە وتەدى. پرەزيدەنتتىڭ قازاسىنا بايلانىستى وزبەكستاندا ءۇش كۇنگە قارالى كۇن جاريالانادى. ەلباسى  نۇرسۇلتان نازاربايەۆ وزبەكستان رەسپۋبليكاسىنىڭ پرەزيدەنتى يسلام كاريموۆتىڭ قايتىس بولۋىنا بايلانىستى وزبەكستان رەسپۋبليكاسى وليي ءماجىلىسى سەناتىنىڭ ءتوراعاسى نيگماتيللا يۋلداشيەۆكە كوڭىل ايتۋ جەدەلحاتىن جولداعان بولاتىن. كونستيتۋسياعا سايكەس، پرەزيدەنتتىڭ مىندەتىن ۋاقىتشا ورىنداۋشى - وزبەكستان رەسپۋبليكاسىنىڭ وليي ءماجىلىسىنىڭ سەنات ءتوراعاسى نيگماتيللا يۋلداشيەۆ.