بۇگىن ق ر پارلامەنتى ءماجىلىسىنىڭ جالپى وتىرىسىندا «قازاقستان رەسپۋبليكاسىنىڭ كەيبىر زاڭنامالىق اكتىلەرىنە ەكسترەميزمگە جانە تەرروريزمگە قارسى ءىس-قيمىل ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭنىڭ جوباسى بويىنشا قورىتىندى ازىرلەۋ ماسەلەسى قارالىپ، بارلىق دەپۋتاتتار ونى ءبىراۋىزدان ماقۇلدادى. اتالعان مىندەت حالىقارالىق ىستەر، قورعانىس جانە قاۋىپسىزدىك كوميتەتىنە جۇكتەلىپ وتىر، - دەپ xابارلايدى Qamshy.kz BNews.kz - كە سىلتەمە جاساپ.
كوميتەت ءتوراعاسى ماۋلەن اشىمبايەۆتىڭ ايتۋىنشا، وسى جۇمىس اياسىندا ەكسترەميزم مەن تەرروريزمگە قارسى كۇرەس، قارۋ-جاراق اينالىمى، كوشى-قون جانە تاعى باسقا ماسەلەلەر بويىنشا وزگەرىستەر مەن تولىقتىرۋلار ەنگىزۋ كوزدەلگەن.
«اتالعان زاڭ جوباسىن ەلباسى سەسسيانىڭ اشىلۋ بارىسىندا ارنايى ايتىپ ءوتتى. زاڭ جوباسىن قابىلداۋداعى ماقسات – تەرروريزم مەن ەكسترەميزمگە قارسى ءىس-قيمىل، قارۋ-جاراق اينالىمىن جانە كوشى-قوندى رەتتەۋ سالاسىنداعى زاڭنامانى جەتىلدىرۋ. كوميتەت وسى زاڭ جوباسىن جۇمىسقا الۋعا جانە قورىتىندى ازىرلەۋگە دايىن»، -دەيدى م.اشىمبايەۆ.
بۇدان بولەك، كوميتەت «قازاقستان رەسپۋبليكاسىنىڭ ۇكىمەتى مەن اتوم ەنەرگياسى جونىندەگى xالىقارالىق اگەنتتىك اراسىنداعى قازاقستان رەسپۋبليكاسىندا اتوم ەنەرگياسى جونىندەگى xالىقارالىق اگەنتتىكتىڭ تومەن بايىتىلعان ۋران بانكىن قۇرۋ تۋرالى كەلىسىمدى راتيفيكاسيالاۋ تۋرالى»، «قازاقستان رەسپۋبليكاسىنىڭ ۇكىمەتى مەن رەسەي فەدەراسياسى ۇكىمەتىنىڭ اراسىنداعى قوسارلانعان سالىق سالۋدى بولدىرماۋ جانە تابىس كاپيتالعا سالىق تولەۋدەن جالتارۋعا جول بەرمەۋ تۋرالى كونۆەنسيا اياسىندا قازاقستان رەسپۋبليكاسىنىڭ جانە رەسەي فەدەراسياسىنىڭ ۋاكىلەتتى ورگاندارى بەرگەن رەزيدەنتتىكتى راستايتىن رەسمي قۇجاتتاردى تانۋ ءتارتىبى تۋرالى نوتالار الماسۋ نىسانىنداعى كەلىسىمدى راتيفيكاسيالاۋ تۋرالى»، سونداي-اق «قازاقستان رەسپۋبليكاسىنىڭ ۇكىمەتى مەن ءبىلىم، عىلىم جانە مادەنيەت ماسەلەلەرى جونىندەگى بىرىككەن ۇلتتار ۇيىمى (يۋنەسكو) اراسىنداعى قازاقستان رەسپۋبليكاسىندا ورتالىق ازيا وڭىرلىك گلياسيولوگيالىق ورتالىعىن قۇرۋ (2-سانات) تۋرالى كەلىسىمدى راتيفيكاسيالاۋ تۋرالى» زاڭ جوبالارى بويىنشا قورىتىندى ازىرلەيدى.
