قىزىلوردا وبلىسىندا تىكۇشاق قۇلاپ، ءتورت ادام زارداپ شەككەن، - دەپ حابارلايدى Qamshy.kz 31-ارناعا سىلتەمە جاساپ.
"قازترانسويل" اكسيونەرلىك قوعامى فيليالىنىڭ قىزمەتكەرلەرى مىنگەن تىكۇشاق كوككە كوتەرىلگەن ساتتە اپاتقا ۇشىراعان. تىكۇشاق بورتىندا جالپى سانى جيىرما ەكى ادام بولعان.
ونىڭ 19 -ى "قازترانسويل" اكسيونەرلىك قوعامى شىعىس فيليالىنىڭ، جەزقازعان مۇناي قۇبىرى باسقارماسىنىڭ قىزمەتكەرلەرى. ال ۇشەۋى ەكيپاج مۇشەلەرى ەكەن. مي-8 تىكۇشاعى "ەۆرو-ازيا ەير" اۋەكومپانياسىنا تيەسىلى. اۋە كولىگى ۆاحتالىق رەجيمدە جۇمىس ىستەيتىن قىزمەتكەرلەردى "قۇمكول" مۇناي وڭدەۋ ستانسياسىنان جەزقازعان قالاسىنا اپارا جاتقان. ال زارداپ شەككەن ءتورت ادام ءارتۇرلى دەڭگەيدە جاراقات العان. العاشقى مەديسينالىق قىزمەت كورسەتىلگەننەن كەيىن، ولار ارى قاراي تەكسەرۋدەن ءوتۋ ءۇشىن قىزىلورداعا جىبەرىلگەن.
