«قازمەديا ورتالىعى» عيماراتىندا اقپارات جانە كوممۋنيكاسيالار ءمينيسترى داۋرەن ابايەۆتىڭ قاتىسۋىمەن «قازاقستان» رترك» اق-تىڭ كەڭەيتىلگەن القا ءماجىلىسى ءوتىپ جاتىر. ماجىلىسكە «قازاقستان» رترك» اق-نىڭ باسقارما ءتورايىمى نۇرجان مۇحامەدجانوۆا مەن كورپوراسيانىڭ دەپارتامەنتتەرى مەن بولىمدەرىنىڭ جانە قۇرىلىمدىق بولىمشەلەرىنىڭ باسشىلارى قاتىستى، - دەپ حابارلايدى Qamshy.kz «ەگەمەن قازاقستان»  باسىلىمىنا سىلتەمە جاساپ.

«قازاقستان» رترك» اق ەلىمىزدەگى تەلەحابار تاراتاتىن ءبىرىنشى ارنا. سول سەبەپتى ونىڭ جۇمىسى دا سوعان ساي بولۋى كەرەك. ول ءۇشىن مينيسترلىك تاراپىنان قاشاندا قولداۋ كورسەتىلىپ كەلەدى جانە الداعى ۋاقىتتا دا سولاي بولادى. بۇگىنگى تاڭدا سىزدەردىڭ الدىلارىڭىزدا قوعامدى ساپالى ءارى تىڭ اقپاراتتارمەن قامتاماسىز ەتۋ باعىتىندا ۇلكەن مىندەتتەر تۇر. وسى رەتتە ءبىز اسىرەسە كورپوراسيانىڭ ايماقتارداعى وكىلدىكتەرىنىڭ  جۇمىستارىن جەتىلدىرۋگە كۇش سالۋ قاجەتتىگىن ايتقىمىز كەلەدى. ايماقتاردا ماتەريالدىق-تەحنيكالىق بازانىڭ جاعدايى دا نازارعا الىنعانى ءجون»، – دەدى مينيستر داۋرەن ابايەۆ. بۇعان قوسا مينيستر حابار تاراتۋ بارىسىندا قازاقستان تاۋەلسىزدىگىنىڭ 25 جىلدىعى ەرەكشە نازاردا بولۋى قاجەتتىگىن ەسكەرتتى. سونداي-اق ول مينيسترلىك پەن قۇزىرلى ورگاندار تاراپىنان گولوۆكين-برۋك كەزدەسۋى سياقتى ايتۋلى شارالاردى كورەرمەندەرگە جەتكىزۋ باعىتىندا دا ءتيىستى جۇمىستار جۇرگىزىلىپ، الداعى ۋاقىتتا قالىڭ كوپشىلىك كوپتەن كۇتكەن وسى سايىستى تاماشالاي الاتىندىقتارىن جەتكىزدى. «مينيسترلىك تاراپىنان ەلىمىزدە حابار تاراتۋ ىسىنە بارىنشا كوڭىل ءبولىنىپ كەلەدى. ەندىگى كەزەك تەك سىزدەردىڭ جۇمىلا جۇمىس ىستەۋلەرىڭىزگە بايلانىستى»، – دەپ اتاپ كورسەتتى د.ابايەۆ.

جيىندا بايانداما جاساعان «قازاقستان» رترك» اق باسقارما ءتورايىمى نۇرجان مۇحامەدجانوۆا ءوزى باسقارىپ وتىرعان ۇجىمنىڭ جۇمىسى مەن جەتىستىكتەرى تۋرالى ەسەپ بەرىپ، الداعى جوسپارلارى جايلى ايتتى.  ونىڭ سوزىنە قاراعاندا، “قازاقستان” ۇلتتىق تەلەارناسى جاساعان تەلەحيكايالار شەتەلدە جوعارى سۇرانىسقا يە. «كورەرمەندەر ىقىلاسىنا بولەنگەن «سىرعالىم»، «قاسىم»، «جامبىل» كوركەم تەلەحيكايالارى بۇگىندە رەسەي، تاتارستان، اقش، كيپر مەن سلوۆەنيا ەلدەرىندە كورسەتىلۋدە»، – دەدى نۇرجان جالاۋ قىزى.

كەڭەيتىلگەن القا ءماجىلىسى كەزىندە «Kazsport» تەلەارناسىنىڭ ديرەكتورى پاۆەل سىبۋلين دە بايانداما جاسادى. ول «اقپاراتتى قازاقستان-2020» مەملەكەتتىك باعدارلاماسىنىڭ  ناسيحاتتالۋداعى ماڭىزىن، سالاماتتى ءومىر سالتىن نەگىز ەتكەن ماقسات-مىندەتتەردىڭ، وتاندىق جانە شەتەلدىك سپورتتىق وقيعالارمەن اقپاراتتاندىرۋدىڭ ماڭىزدىلىعىنا توقتالدى. ەڭ باستىسى – قازاقستاندىقتاردىڭ نازارىن سپورتقا اۋدارۋ ەكەنىن ايتتى.

«تەلەارنا سپورت سالاسى بويىنشا 7 باعىتتا قىزمەت ەتەدى.  كوبىنە ەفيردە كاسىبي سپورتپەن بايلانىستى كونتەنت بەرىلەدى. ولاردىڭ قاتارىندا ق ر مادەنيەت جانە سپورت مينيسترلىگى ۇسىنعان جارىستاردىڭ جىلدىق جوسپارىنا جانە  قازاقستاندىق اتلەتتەردىڭ قاتىسۋىمەن وتەتىن  حالىقارالىق سايىستاردىڭ كەستەسىنە سايكەس ءتۇرلى چەمپيوناتتار مەن تۋرنيرلەردەن ترانسلياسيالار بار»، – دەپ اتاپ ءوتتى پ.سىبۋلين.