بيىلعى جىلدىڭ 27 تامىزى مەن 4 قىركۇيەگى ارالىعىندا ماسكەۋدە  حالىقارالىق اسكەري-مۋزىكالىق فەستيۆال ءوتتى. الەمنىڭ ءار تۇكپىرىنەن مايتالماندار جينالعان ءان مەرەكەسىندە قازاقستان رەسپۋبليكاسى مەملەكەتتىك كۇزەت قىزمەتىنىڭ  پرەزيدەنتتىك وركەسترى ونەر كورسەتتى، - دەپ حابارلايدى Qamshy.kz.

«سپاسسكايا باشنيا» — مەملەكەت باسشىلارىنىڭ قۇرمەت قاراۋىلدارى مەن ۇزدىك دەپ تانىلعان اسكەري شىعارماشىلىق ۇجىمداردىڭ ونەرىن جۇرتشىلىق نازارىنا ۇسىناتىن حالىقارالىق فەستيۆال.

اتالمىش ونەر مەرەكەسىنە مەملەكەتتىك كۇزەت قىزمەتىنىڭ قۇرمەت قاراۋىل روتاسى جانە پرەزيدەنت وركەسترى 2009 جىلدان بەرى ارنايى قوناق رەتىندە قاتىسىپ كەلەدى.

پلاس-كونسەرتتە كورەمەننىڭ كوزايىمىنا اينالعان پرەزيدەنتتىك وركەستر سوليستەرى ايىم قوعاموۆا مەن مەيرامبەك قاراعاندى «2 Unlimited» توبىنىڭ «No limit» ءانىن تاماشا ورىنداپ شىقتى. قازاق انشىلەرى اۋەلەتكەن پاتريوتتىق اندەر، ساپ تۇزەگەن اسكەري قىزمەتشىلەردىڭ قارۋمەن كۇردەلى ەلەمەنتتەردى كورسەتۋدەگى شەبەرلىگىنە شەت ەل جۇرتشىلىعى تاڭ قالىپ، رەسەيلىك كورەرمەندەر سۇيسىنە قول سوقتى. قازاقستاندىق ونەرپازدار ۇسىنعان كورسەتىلىمنىڭ ءبىرىنشى ءبولىمى "يگرا پرەستولوۆ" تەلەحيكاياسىنىڭ ساۋندترەك اۋەنىمەن سۇيەمەلدەنىپ، قۇرمەت قاراۋىل روتاسىنىڭ ساربازدارى سالتاناتتى مارشتى ءمىنسىز ورىنداپ شىقتى.

پرەزيدەنتتىك وركەستردىڭ ءسوليسى الىبەك ءىزباساروۆتىڭ ورىنداۋىنداعى اندەردى دە جۇرتشىلىق ىستىق ىقىلاسپەن قابىلدادى. «DjSmاsh» جانە «ۆينتاج» توبىنىڭ «موسكۆا» ءانى قازاقستاندىق مۋزىكانتتاردىڭ ماسكەۋلىك كورەرمەندەرگە جاساعان ەرەكشە تارتۋى رەتىندە بولدى.

ماسكەۋ قالاسىنىڭ قالا كۇنىنە جانە "كينو جىلىنا" ارنالعان مەرەكەلىك شارا اياسىندا ق ر پرەزيدەنتتىك وركەسترى شاھار ساياباقتارىندا ونەر كورسەتىپ، قالا تۇرعىندارىنىڭ قوشەمەتىنە بولەندى.

بۇعان دەيىن «سپاسسكايا باشنيا» فەستيۆالىندە جالپى سانى 40 جۋىق مەملەكەتتىڭ 140 مۋزىكالىق ۇجىمدارى ونەر كورسەتىپتى.  بيىل توعىزىنشى رەت ۇيىمداستىرىلىپ وتىرعان فەستيۆالگە سينگاپۋر، سلوۆەنيا، اۆستريا، گرەسيا، رەسەي، موڭعوليا، بەلارۋس، يتاليا، يزرايل، جاپونيادان كەلگەن اسكەري وركەسترلەر قاتىسقان.

ايىم قوعاموۆا، ق ر پرەزيدەنتتىك وركەسترىنىڭ ءانشىسى:

— فەستيۆالدەن العان اسەرىم ەرەكشە. بۇعان دەيىن الەمنىڭ كوپتەگەن مەملەكەتتەرىندە قازاق اندەرىن شىرقاپ، ونەر كورسەتكەن ەدىم. ال اسكەري اندەر فەستيۆالىنە قاتىسۋ مەن ءۇشىن ۇلكەن سىن بولدى. شەت ەلدىك ونەرپازدارمەن كەزدەسكەندە ولار قازاق ونەرى تۋرالى كوپ سۇرادى. قازاقستانعا كەلىپ، ۇلتتىق ناقىشتاعى كونسەرتتەردى ءوز كوزدەرىمەن تاماشالاعىسى كەلەتىنىن ايتتى. بىرنەشە تىلدە ءان ايتسام دا قازاق اندەرىن شەت ەل ساحناسىندا تامىلجىتا شىرقاۋعا كەلگەندە وزىمە ۇلكەن سىنمەن قارايمىن.

شارافات جىلقىبايەۆا