ريو-دە-جانەيروداعى پاراليمپيادا ويىندارىندا جۇزۋدەن ءزۇلفيا عابيدۋللينا التىن مەدال جەڭىپ الدى، - دەپ حابارلايدى، -Qamshy.kz ءتىلشىسى قازاقستاننىڭ پاراليمپيادا ۇلتتىق كوميتەتىنىڭ باسپا ءسوز قىزمەتىنە سىلتەمە جاساپ.
ءزۇلفيا عابيدۋللينا 100 مەتر قاشىقتىققا ەركىن ستيلدە جۇزۋدەن الەم رەكوردىن جاڭارتتى. ول الەمنىڭ التى دۇركىن چەمپيونى جانە ازيا پارا ويىندارىنىڭ چەمپيونى، الەمنىڭ قولا جۇلدەگەرى. سپورتشى الەم رەيتينگىندە ۇزدىك سەگىزدىك قاتارىندا.
8 قىركۇيەكتە ماراكانا ستاديونىندا ريو-2016 پاراليمپيادا جازعى ويىندارىنىڭ اشىلۋ سالتاناتى بولىپ وتكەن ەدى. قازاقستان قۇراماسىنان كوك بايراعىمىزدى استانالىق ءجۇزۋشى، حالىقارالىق دەڭگەيدەگى سپورت شەبەرى، ق ر ابسوليۋت چەمپيونى جانە لوندونداعى 2012 جىلعى پاراليمپيادا ويىندارىنىڭ قاتىسۋشىسى ءانۋار احمەتوۆ ۇستاپ شىققان بولاتىن.
