كارىم ءماسىموۆتىڭ كۇتپەگەن جەردەن ۇلتتىق قاۋىپسىزدىك كوميتەتىنىڭ ءتوراعاسى بولىپ تاعايىندالۋى نەنى بىلدىرەدى؟ «كەلەسى پرەمەر كىم بولادى؟» دەگەننەن گورى، ءماسىموۆتىڭ جاڭا قىزمەتىنىڭ استارى كەشەلى بەرى الەۋمەتتىك جەلىلەردە قاتتى تالقىلانىپ جاتىر. ەل اراسىندا جەلدەي ەسكەن قاۋەسەتتەرمەن، الۋان ءتۇرلى ايتىلعان پىكىرلەرگە بىرەر ساعات بۇرىن نۇرسۇلتان نازاربايەۆتىڭ ءوزى جاۋاپ بەردى، - دەپ حابارلايدى Qamshy.kz 31-ارناعا سىلتەمە جاساپ.
قازاقستان تاريحىندا ۇكىمەتتىڭ تىزگىنىن ەڭ ۇزاق ۇستاعان كارىم ءماسىموۆتىڭ كۇتپەگەن جەردەن ۇلتتىق قاۋىپسىزدىك كوميتەتىنىڭ ءتوراعاسى بولىپ تاعايىندالۋى ساياساتكەرلەردى دە، بىلايعى جۇرتتى دا بەيجاي قالدىرماعانى انىق. سوڭعى كەزدەرى ءوزى دە، تۆيتەرى دە ءۇنسىز قالعان قاجىمقانۇلىن «جۇمباق تۇلعاعا» بالايتىندار دا كوپ. اقىرى قۇپيا قىزمەتكە كەلگەن ەكس-پرەمەردىڭ ەندىگى ميسسياسى قانداي بولماق؟ تاڭداۋ نەگە ماسىموۆكە ءتۇستى؟ پرەزيدەنت ونى بىلاي ءتۇسىندىردى.
نۇرسۇلتان نازاربايەۆ، قازاقستان رەسپۋبليكاسىنىڭ پرەزيدەنتى:
- كارىم ءماسىموۆتى ءوزىنىڭ كەلىسىمى بويىنشا، قازىرگى ۋاقىتتا وتە قاجەت بولىپ وتىرعانىن كورىپ وتىرسىزدار. تەرروريزم بار، باسقاسى بار. تاجىريبەسى بار.
ساياسي شەشىم وسىنداي بولدى. ەندىگى ماسەلە-تەرروريزم ءقاۋپى كۇشەيگەن شاقتا، ءماسىموۆ قاۋىپسىزدىك قىزمەتىنە قانشالىقتى قۇندى جاڭالىق ەنگىزە الادى؟ بۇل تۇرعىدا ساراپشىلاردىڭ پىكىرى ەكىۇشتى.
راسۋل جۇمالى، ساياساتتانۋشى:
- ەكسترەميزم، حالىقارالىق جاعداي ءماز ەمەس كۇردەلى. سوندىقتان ۇلتتىق قاۋىپسىزدىك كوميتەتىنىڭ ماڭىزى دا ارتىپ وتىرعان جاعدايى بار. سوندىقتان، ءماسىموۆ سياقتى سەنىمدى وكىلىن قويۋ قاۋىپسىزدىك ماسەلەسىنە دەگەن بەلگىلى ءبىر جاۋاپكەرشىلىكتىڭ ارتقانىنىڭ كورسەتكىشى.
ال، كەيبىر ساراپشىلار كەرىسىنشە "بۇل ءماسىموۆ ءۇشىن ۋاقىتشا قىزمەت، اراعا بىر-ەكى جىل سالىپ ول قۇپيا قىزمەتتەن جاريا قىزمەتكە قايتىپ ورالادى" دەگەن سەنىمدە. قالاي بولعاندا دا كارىم قاجىمقان ۇلى پرەزيدەنتكە جاقىن ءارى ەڭ ىقپالدى تۇلعالاردىڭ ءبىرى. مەملەكەت باسشىسى ەڭ اۋەلدەن ءماسىموۆتى ەرەكشە تانىستىرعان بولاتىن.
نۇرسۇلتان نازاربايەۆ، قازاقستان رەسپۋبليكاسىنىڭ پرەزيدەنتى:
- ون ۋروجەنەس سەلينگرادا، كازاح. ۆسە سوپپوداەت، داجە ۋ نەگو ەست ۋسى.
